परतीच्या पावसाने शहराला झोडपले
पहाटे जोरदार पाऊस, दिवाळीची खरेदी पावसातच

सकाळ वृत्तसेवा
कोल्हापूर, ता. ३१ ः परतीच्या पावसाचा जोर ऑक्टोबर महिन्यातही कायम आहे. कमी कालावधीत जास्त पाऊस असे परतीच्या पावसाचे स्वरूप असून, दिवाळीच्या खेरदीवर मात्र पावसाचे सावट दूर होत नाही. गुरुवारी (ता.३१) पहाटे शहरातील काही भागांत जोरदार पाऊस पडला, तर काही भागांत पावसाच्या हलक्या सरी बरसल्या.
राज्यात यंदा मॉन्सून शंभर टक्केपेक्षा अधिक झालेला आहे. मात्र, त्यानंतर परतीचा पाऊस सक्रिय झाला. ऐन दिवाळीमध्ये पाऊस पडणार असा अंदाज वेधशाळेने वर्तवला होता. दिवसभर पाऊस पडला नाही. मात्र, काही भागांत रात्री ९ वाजता पावसाच्या सरी बरसल्या. त्यानंतर मध्यरात्री कसबा बावडा, मुक्तसैनिक वसाहत, ताराबाई पार्क, शुक्रवार पेठ, कळंबा या भागांत पावसाचा जोर अधिक होता. दिवाळीच्या उस्ताहावर पावसाचे पाणी पडणार का, अशी शंका होती. मात्र, दिवसभर आणि रात्रीही पावसाने उघडीप दिल्याने ग्राहकांना खरेदीचा आनंद घेता आला. फेरीवाल्यांनी पावसापासून वस्तूंचे संरक्षण करण्यासाठी ताडपत्री, प्लास्टिकचे कागद अशी सर्व व्यवस्था केली होती. ग्राहकांनीही छत्री घेऊन खरेदीला जाणे उचित समजले. मात्र, पावसाच्या विश्रांतीने दिवाळीचा उत्साह द्विगुणीत झाला.