केवळ ३००० गूळ रव्यांचीच आवक
हंगाम उद्यापासून ः पाऊस, अपुऱ्या मनुष्यबळामुळे दहा दिवस उशीर

सकाळ वृत्तसेवा
कोल्हापूर, ता. ३१ ः अवेळी पावसाने धरलेला जोर, अपुरे मनुष्यबळ, अशाश्वत भाव अशा विविध समस्यांचा सामना करतच यंदाचा नवीन गूळ हंगाम शनिवारी (ता. २) पासून सुरू होणार आहे. दरवर्षीच्या तुलनेत यंदा दहा दिवस हा हंगाम उशिरा सुरू होत असूनही जेमतेम साडेतीन हजारांवर गूळ रव्यांची आवक शाहू मार्केट यार्डातील गूळ बाजारपेठेत झाली आहे. त्यामुळे यंदाच्या गूळ हंगामावर चिंतेचे सावट आहेत.
जिल्ह्यातील गुळाचा हंगाम ऑक्टोबर महिन्यात सुरू होतो. दिवाळीतील मुहूर्ताच्या सौद्यासाठी जवळपास २० ते २५ हजार गूळ रव्यांची आवक होते. यंदा नोव्हेंबर आला तरीही पावसाचा जोर आहे. ऊस शेतीत चिखल आहे. गुऱ्हाळघरे भिजलेली आहेत. त्यांची डागडुजी सुरू झाली; पण मध्येच पावसाने जोर पकडला. त्यामुळे जिल्ह्यातील ६० टक्के गुऱ्हाळघरे अद्याप बंदच आहेत. त्यातच बीड, धाराशिव, बार्शीकडून येणारे गुऱ्हाळघरावरील कामगार अजूनही पूर्ण क्षमतेने आलेले नाहीत. आलेल्या मोजक्याच कामगारांसह स्थानिक शेतमजुरांची मदत घेऊन जेमतेम २० ते ३० गुऱ्हाळघरांवर गूळ उत्पादन सुरू झाले. काही ठिकाणी या आठवड्यात उत्पादन सुरू होण्याची शक्यता आहे.
तीन वर्षांत गुळाला सरासरी तीन ते साडेतीन हजारांचा भाव मिळतो. त्यातून फारसा नफा झालेला नाही. चांगल्या प्रतीच्या गुळाचा चांगला भाव मिळतो, हे तत्त्व घेऊन गूळ उत्पादनात वाढ व भाववाढही मिळण्याची शक्यता आहे.

चौकट
साखरेचे भावही वाढले...
जिल्ह्यातील एकूण गूळ उत्पादनातील ४० ते ४५ टक्के गुळात साखरेचे मिश्रण असल्याचेही सांगण्यात येते. मात्र, साखरेचेही भाव वाढले आहेत. त्यामुळे यंदा त्यावर मर्यादा येणार आहेत. साहजिकच यंदाच्या हंगामात चांगल्या प्रतीच्या गुळाचे उत्पादन वाढेल, अशी अपेक्षा आहे. मात्र, त्यासाठी पाऊस पूर्ण थांबणे, गुऱ्हाळघरावर मनुष्यबळ पुरेशा प्रमाणात उपलब्ध होणे, यावरच यंदाच्या गुळाचे उत्पादन वाढणे शक्य होणार आहे.