आता पिपाणी नव्हे
ट्रम्पेट असा उल्लेख
सकाळ न्यूज नेटवर्क
मुंबई, ता. ३१ ः ‘तुतारी वाजवणारा माणूस’ या निवडणूक चिन्हाला ‘पिपाणी’ अडचणीची ठरू लागल्यामुळे यापुढे निवडणूक तक्त्यामध्ये ‘पिपाणी’ला मराठीतही ‘ट्रम्पेट’च उच्चारले जावे आणि मतपत्रिकेतही त्याचा ट्रम्पेट म्हणून उल्लेख केला जावा, असा महत्त्वपूर्ण निर्णय मुख्य निवडणूक आयोगाने दिला आहे. निवडणूक चिन्हामध्ये ‘ट्रम्पेट’ हे मुक्त चिन्ह असल्यामुळे तुतारी आणि पिपाणी या नामसाधर्म्यामुळे मतदारांचा गोंधळ निर्माण होत असल्याची तक्रार शरदचंद्र पवार पक्षाने निवडणूक आयोगाकडे केली होती.
पिपाणी हे चिन्हच रद्द केले जावे अशी शरदचंद्र पवार पक्षाची मागणी होती. मात्र, चिन्ह रद्द किंवा न गोठवता त्यातून निर्माण होणारा संभ्रम कमी करण्याचा प्रयत्न आयोगाने केल्याने राष्ट्रवादी कॉंग्रेस शरदचंद्र पवार पक्षाला दिलासा मिळाला आहे. ट्रम्पेटचे मराठीत भाषांतर तुतारी, पिपाणी, बिगुल असे केले जाते. त्यामुळेही मतदारांचा संभ्रम होण्याची शक्यता आहे. त्यामुळे एअरकंडीशन, टीव्ही या निवडणूक चिन्हांचे भाषांतर न करता ते इंग्रजीत वापरले जातात त्याप्रमाणे ट्रम्पेटचे देखील मराठी भाषांतर न करता ट्रम्पेट असाच उल्लेख मतपत्रिकेत आणि इतरत्र करण्याची सूचना आयोगाने केली आहे.