किरकोळ गुन्हेगारांवरही राहणार लक्ष
जिल्ह्यात गडहिंग्लजला सर्वाधिक संख्या; आरोपी दत्तक योजनेतून प्रत्येक महिन्याला शहानिशा

दीपक कुपन्नावर : सकाळ वृत्तसेवा

गडहिंग्लज, ता. २२ : जिल्हयात गडहिंग्लजची सुस्कृंत आणि शांतताप्रिय छोटे शहर म्हणून ओळख आहे. साहजिकच जिल्ह्यातील ३० पोलिस ठाण्यांच्या तुलनेत येथे गंभीर गुन्ह्यांची संख्या तुरळक आहे. पण, ही संख्याही कमी व्हावी यासाठी आरोपी दत्तक योजनेव्दारे येथील पोलिस ठाण्याने कंबर कसली आहे. किळकोळ गुन्हेगारांचा योजनेत समावेश करून त्यांच्या हालचालींवर लक्ष केंद्रित केले आहे. त्यामुळे योजनेतील स्थानिक गुन्हेगारांची संख्या जिल्ह्यात १४९ ही सर्वाधिक झाली. त्यांच्याकडून पु्न्हा गुन्हे होणार नाहीत यासाठी दक्षता घेतली जात आहे.
कोल्हापूर जिल्हा पोलिस अधीक्षक महेद्र पंडित यांच्या संकल्पनेतून आऱोपी दत्तक योजना राबवली जात आहे. जिल्हयातील ३० पोलिस ठाण्यांच्या रेकॉर्डवरील गुन्हेगारांची माहिती संकलित करण्यात आली. जिल्ह्यात एकूण १ हजार ५२६ आरोपी यासाठी संबधित पोलिस ठाण्यांनी दत्तक घेतले आहेत. प्रत्येक पोलिस ठाण्याने आपल्या हद्दीतील सराईत गुन्हेगारांचा या योजनेत समावेश केला. मात्र, येथील ठाण्यात मुळातच गंभीर गुन्ह्यांचे प्रमाण कमी आहे. यासाठी केवळ सराईतच नव्हे तर किळकोळ गुन्हेगारांचाही जाणीवपूर्वक या योजनेत समावेश केला. यामुळेच जिल्हयात या ठाण्याची योजनेतील आऱोपींची संख्या १४९ ही सर्वाधिक झाली. त्यापाठोपाठ करवीर, शाहूपुरी प्रत्येकी १४० यांचा क्रम आहे. योजनेत दत्तक घेतलेल्या सर्वच आरोपींना येथील पोलिस ठाण्यात बोलवून सध्याचा फोटो, मोबाईल क्रमांक, करत असलेले काम यांची माहिती घेण्यात आली. पोलिस ठाण्यातील सर्वच कर्मचा-यांना याची माहिती व्हावी यासाठी ओळख परेडही करण्यात आली. आरोपींनी दिलेल्या माहितीनुसार संबधित गुन्हेगारावर नजर ठेवली जात आहे. यासाठी स्वतंत्र रजिस्टर घालून त्यात नोंदी ठेवल्या जात आहेत. या पाळतीमुळे स्थानिक गुन्ह्यांचे प्रमाण आणखी कमी होण्याची अपेक्षा आहे.

चौकट...
गुन्हेगारावर वचक
किरकोळ गुन्हेगार म्हणून बऱ्याचदा पोलिसांचे दुर्लक्ष होते. त्यामुळे अश्याकडून गुन्ह्यांची पुनरावृत्ती होण्याची शक्यता असते. त्यामुळेच अशांवरच लक्ष ठेवण्याची येथील पोलिस ठाण्याची योजना आहे. पोलिसांचे आपल्यावर नजर असल्याचे लक्षात आल्याने त्यांच्याकडून गुन्ह्यांचे प्रमाण कमी होऊन वचक राहणार आहे.

कोट...
''इतरांच्या तुलनेत याठिकाणी कमी गुन्हे घडत असताना स्थानिक किळकोळ आऱोपींनाही योजनेत सामावून घेतले. परिणामी, कोल्हापूर, इचलकरंजी ठाण्यापेक्षा अधिक आऱोपींचा या योजनेत समावेश झाला. ठाण्यातील प्रत्येक कर्मचाऱ्याला ३ आरोपी संपर्कासाठी दत्तक देऊन पोलिस अधीक्षक पंडित यांच्या सूचनेनुसार माहितीची शहनिशा करण्याचे नियोजन आहे.
- अजय सिंदकर, पोलिस निरीक्षक, गडहिंग्लज