निगडी, ता.१६ : दिवाळीनिमित्त विविध संस्थांच्यावतीने निगडी प्राधिकरणात सांगीतिक दिवाळी पहाट कार्यक्रमांचे आयोजन करण्यात आले आहे. त्यामुळे रसिकश्रोत्यांना दिवाळी फराळासोबत उत्तम संगीत मेजवानी मिळणार आहे.
पिंपरी चिंचवड महापालिकेच्यावतीने शनिवारी (ता.१८) दिवाळी पहाट अंतर्गत ‘दीपगंध सुरांचा’ हा संगीतमय कार्यक्रम आयोजित करण्यात आला आहे. त्याच दिवशी संध्याकाळी ५ वाजता संवादिनी वादन सोहळा होणार आहे. हे दोन्ही कार्यक्रम ग. दि. माडगूळकर सभागृहात होणार आहेत; तर ज्ञानप्रबोधिनी निगडी केंद्र येथे शनिवार सकाळी सहा वाजता मनोहर सभागृहात दिवाळी पहाट हा सोहळा होणार आहे. सुप्रसिद्ध गायक राहुल देशपांडे यांच्या गाण्याच्या सुरेल मैफिलीचा कार्यक्रम शुक्रवार (ता.१७) पहाटे ५.३० वाजता निगडी प्राधिकरणातील नियोजित महापौर निवास येथे रंगणार आहे. हा कार्यक्रम विनाशुल्क असून त्याचा लाभ सर्व नागरिकांनी आवर्जून घ्यावा, असे आवाहन आयोजक माजी उपमहापौर शैलजा मोरे व भाजप युवा मोर्चा प्रदेशाध्यक्ष अनुप मोरे, भाजप पदाधिकारी सलीम शिकलगार, अरुण थोरात आणि अतुल इनामदार यांनी केले आहे. याखेरीज, ‘स्वरमिलाफ’ हा संगीत मेजवानीचा कार्यक्रम ग. दि. माडगुळकर येथे १९ ऑक्टोबरला सायंकाळी ५ वाजता होणार आहे. या सर्व कार्यक्रमांत शास्त्रीय, सुगम, भक्तिगीत, नाट्यसंगीत तसेच लोकसंगीताच्या स्वरांचा आनंद अनुभवता येणार आहे.