सोमाटणे, ता. २४ ः मावळात परतीच्या पावसामुळे भाताचे नुकसान होण्याच्या भीतीने शेतकऱ्यांची चिंता वाढली आहे.
दरवर्षी लक्ष्मीपूजनानंतर वनदेवाची पूजा करून शेतकरी भात कापणीच्या कामाला सुरवात करतात. सध्या भाताची दाने भरणी पूर्ण होऊन भात कापणीला आले आहेत. भात कापणीला सुरवात करणार तोच गुरुवारी परतीच्या पावसाने हजेरी लावली. पावसाचा जोर कमी असल्याने भातावर फारसा परिणाम झाला नाही. परंतु ढगाळ वातावरण निर्माण झाले आहे. तसेच हवामान खात्यानेही पावसाचा अंदाज वर्तवल्याने ऐन कापणीला आलेल्या भाताचे नुकसान होण्याची शक्यता आहे. या वर्षी भाताचे पीक चांगले आले असून उत्पादन वाढण्याच्या शक्यतेने उत्साहाचे वातावरण असतानाच पावसाने हजेरी लावल्याने शेतकऱ्यांची चिंता वाढली आहे.