संवाद माझा

‘सेल्फी पॉइंट होऊनही कचरा

चिंचवडे नगरच्या कोपऱ्यावर कचरा टाकून घाण होते. त्यावर उपाय म्हणून प्रशासनाने स्वच्छता करून ‘सेल्फी पॉइंट केला. तरीही त्यासमोर लोक कचरा फेकून निघून जातात. अशा बेजबाबदार नागरिकांवर कडक कारवाई व्हायला पाहिजे.
- सुहास कुलकर्णी, शांतीबन सोसायटी, चिंचवड

PNE25V32832

विजेच्या खांबांमुळे धोका

विद्यानगर प्रभाग क्रमांक १० येथील विजेचे खांब गेल्या काही महिन्यांपासून बंद आहेत. त्यामुळे रात्री या परिसरात खूप अंधार असतो. त्यामुळे काही अनुचित प्रकार घडू शकतो. विजेच्या खांबांच्या तारा खाली आल्या आहेत. त्यामुळे जीवितहानी होऊ शकते. याविषयी महावितरणला अनेक वेळा कळविले आहे, परंतु त्यांच्याकडून कार्यवाही झालेली नाही. महावितरणने आपली जबाबदारी लवकरात लवकर पूर्ण करावी.
- तुषार काशीद, चिंचवड

PNE25V32831

रिक्षा अनेक महिने पडून

पिंपळे निळख विशालनगर परिसरातील डीपी रस्त्यावरील डॉमिनोज पिझ्झाच्या समोरील वाहनतळाच्या जागेत एक रिक्षा अनेक महिने पडून आहे. या रिक्षाचे अनेक सुटे भाग काढून नेण्यात आले आहेत. या रिक्षामुळे वाहनतळातील जागा विनाकारण अडली आहे. त्यामुळे हा परिसर विद्रूप होत आहे. याविषयी सारथी अॅपद्वारे तक्रार केली आहे, मात्र कोणतीही कारवाई न करता तक्रार निकाली काढण्यात आली.
- हर्षवर्धन शेटे, पिंपळे निळख

PNE25V32830

आयुक्तांच्या आदेशाला ‘केराची टोपली’

पिंपरी-चिंचवड शहरात सतत वाहतूक कोंडी होते. याचे मुख्य कारण म्हणजे रस्ता आणि पदपथावर असंख्य बेवारस, नादुरूस्त वाहने पडून आहेत. त्यामुळे सुस्थितीतील वाहने लावण्यास जागा मिळत नाही. बेवारस वाहनांखाली कचरा, घाण जमा होऊन डासांची पैदास होते. अशा वाहनांमुळे शहर बकाल होते. अशी वाहनांवर कारवाई करून ती मोशी येथील महापालिकेच्या जागेवर ठेवण्याबाबत आयुक्तांनी २०२२ मध्ये आदेश दिला होता. यानंतरही अतिक्रमण विभाग बेवारस वाहने हटवित नाही. नागरिक जनसंवाद सभेत मुद्दा उपस्थित करतात. तसेच वर्तमानपत्रात छायाचित्रासह बातमी येते. अधिकाऱ्यांना पत्राने कळवून किंवा प्रत्यक्ष भेटून विनंती करूनही कर्मचारी, बीट निरीक्षक दखल घेत नाहीत. त्यामुळे रस्त्यावरील बेवारस वाहनांच्या संख्येत वाढ होते. आयुक्तांच्या आदेशानुसार पालिका कर्मचाऱ्यांनी कारवाई करावी.
- दि. चं. बाफना, वाकड

PNE25V32834

तुटलेले चेंबर दुरुस्त करा

चापेकर चौकातून जकात नाक्याकडे जाताना वाटेत शांतीबन सोसायटी जवळ मोठे चेंबर तुटले आहे. वर्दळीचा विचार करता केव्हाही गंभीर अपघात होऊ शकतो. त्यामुळे महापालिकेने चेंबरची लवकर दुरुस्ती करावी.
- रमेश पाटील, चिंचवड
PNE25V32833

पदपथावर कचरा

रावेतमधील शिंदे वस्ती चौकातील गणपती मंदिराजवळील कचरा
पडून असतो. तो कधीही उचलला जात नाही. पदपथावर अनेक बेजबाबदार नागरिक कचरा टाकून जातात. शेजारी विद्येची देवता असलेल्या गणपतीचे मंदिर त्यांना दिसत नाही का, असा प्रश्न पडतो. येथे पीएमपीएल बस क्रमांक ३०७ चा थांबा आहे. चेंबरची जुनी गंजलेली जाळी तिथेच पडून आहे. याच सदरात दाद मागितल्यानंतर तेथील पदपथावर वाहने दिसत नाहीत. त्याप्रमाणे कचऱ्याचा प्रश्नही सुटेल, हीच अपेक्षा.

-श्रीनिवास ढोंगडे, रावेत

PNE25V32836

आकुर्डी स्थानकासमोर गुरुद्वारा चौकाकडील रस्ता बांधून फक्त दोन वर्ष झाली आहेत, पण त्यावर खड्डे झाले आहेत. अनेक ठिकाणी पडल्याने संबंधितांनी तत्काळ दुरुस्त करावी. या अडचणीमुळे, कोंडी, अपघात होतात. अशा कामांसाठी ठेकेदाराकडून कोणतीही हमी घेतली जात नाही का, किती वर्षे दुरुस्ती करावी लागणार नाही असे प्रश्न प्रशासनाला पडत नाहीत का...

- विनय मोने, वाल्हेकरवाडी, प्राधिकरण
PNE25V32835