अपुऱ्या निधीमुळे १०० बंद पडण्याच्या मार्गावर; परिस्थिती अत्यंत बिकट
धायरी - ग्रंथालयांना मिळणाऱ्या अपुऱ्या अनुदानामुळे ग्रंथालयांची मोठी परवड होत आहे. पुणे जिल्ह्यातील ५६५ ग्रंथालयापैकी ५० पेक्षा  अधिक ग्रंथालये बंद आहेत. १०० पेक्षा अधिक ग्रंथालये बंद पडण्याच्या मार्गावर आहेत. अनेक ग्रंथालयांची परिस्थिती अत्यंत बिकट आहे. 

ताज्या बातम्यांसाठी करा ई-सकाळचे ऍप 

सार्वजनिक ग्रंथालयांना स्वत:चे असे वेगळे उत्पन्न नसल्याने त्यांना अनेक बाबतीत मर्यादा पडतात. ग्रंथालयाची छोटी- मोठी कामे करायची म्हटल्यास अपुऱ्या निधीअभावी ती रखडल्याचे पाहावयास मिळते. दुसऱ्या बाजूला खासगी ग्रंथालयांना वाचकांची मिळणारी पसंती सार्वजनिक ग्रंथालयांमधील उणेपणा अधोरेखित करते.

सोशल माध्यमांच्या आहारी गेलेल्या आजकालच्या युवा पिढीला शहाणपणाच्या दोन गोष्टी शिकवण्यासाठी पुस्तके उपयोगी पडतात. वाचनातून नवी ऊर्जा मिळाली, यासाठी तरुणाईने जास्तीत जास्त वाचन करावे. असाही आग्रह घरातील वडीलधाऱ्या माणसांकडून धरला जातो. याकरिता उभारण्यात आलेल्या शासकीय सार्वजनिक ग्रंथालयांमधील चित्र निराशाजनक आहे. सरकारने एकीकडे पुस्तकांचं गाव उभारलं; मात्र दुसऱ्या बाजूला सार्वजनिक ग्रंथालयांची उदासीनता गंभीर प्रश्‍न उपस्थित करणारी आहे. तुटपुंजे अनुदान, अनेक सोयीसुविधांचा अभाव यामुळे सार्वजनिक ग्रंथालये वाचनालय नव्हे, तर गप्पालये होऊ लागली आहेत.