दौंड, ता. १६ : दौंड शहरात भरदिवसा रेल्वेच्या एका वरिष्ठ अधिकाऱ्याच्या घरी झालेल्या चोरीत एक तोळे वजनाचे सोन्याचे दागिने चोरीस गेले आहेत.
शहरातील बंगला साइड येथील आरबी-फोर या रेल्वे वसाहतीमध्ये मंगळवारी (ता. १४) दुपारी साडेचार ते सायंकाळी साडेपाचच्या दरम्यान ही चोरी झाली. रेल्वेच्या पुणे विभागात सहायक विभागीय यांत्रिक अभियंतापदावर असलेले सिद्धार्थ देवेंद्र सिंग यांच्या घरी ही चोरी झाली. सिंग यांच्या पत्नी घराला कुलूप लावून बाजारपेठेत गेल्यावर ही चोरी झाली. चोरट्यांनी कुलूप तोडून आत प्रवेश करून लोखंडी कपाटातील एक तोळे वजनाची सोनसाखळी, कर्णफुले व रेल्वे प्रशासनाने दिलेला सॅमसंग कंपनीचा टॅब चोरून नेला आहे. दौंड पोलिस ठाण्यात सिंग यांच्या फिर्यादीनुसार अज्ञाताविरुद्ध घरफोडी प्रकरणी गुन्हा दाखल केला आहे.