जुन्नर, ता. २६ : श्री स्वामी समर्थ विसावा मंदिर, समर्थनगर- कुसूर (ता. जुन्नर) येथे शनिवारी (ता. २६) श्री स्वामी समर्थ महाराज पुण्यतिथी सोहळा विविध धार्मिक कार्यक्रमांनी साजरा करण्यात आला. यानिमित्त श्री स्वामी चरित्र सारामृत सामुदायिक पारायण करण्यात आले. यावेळी स्वामी भक्तांच्या वतीने विविध प्रकारच्या १५६ पदार्थांचा नैवेद्य अर्पण केल्याचे आयोजक तुकाराम महाराज दुराफे यांनी सांगितले.
मंदिरात सकाळी भूपाळी आरती आणि ॐ श्री स्वामी समर्थ जप तसेच श्री स्वामी समर्थ व दत्त मूर्तीस सामुदायिक अभिषेक आणि साईमाऊली पादुका पूजन करण्यात आले. मंदिरातील मूर्तींना चंदन लेप करण्यात आला. त्यानंतर पालखी सोहळा आणि औदुंबर प्रदक्षिणा झाली. दुपारी नैवेद्य आणि श्रींची महाआरती, महाप्रसादाचे आयोजन केले होते. मंदिरात विद्युत रोषणाई आणि फुलांची सजावट केली होती. दिवसभर भाविकांची दर्शनासाठी गर्दी झाली होती. रात्री श्रींच्या महाआरतीने सोहळ्याची सांगता झाली.