जुन्नर, ता. १६ : कुमशेत (ता. जुन्नर) येथील मारुती मंदिर देवस्थान ट्रस्ट अस्तित्वात असतानाही नवीन हनुमान मारुती देवस्थान ट्रस्टची स्थापना केली. याप्रकरणी मुंबई उच्च न्यायालयाने तसेच दिल्ली येथील सर्वोच्च न्यायालयाने सहधर्मदाय आयुक्त, पुणे यांनी दिलेला निर्णय कायम ठेवत विरोधकांचा अर्ज फेटाळल्याची माहिती कुमशेतच्या माजी सरपंच आणि अर्जदार वीणा डोके यांनी दिली.
स्थानिक ग्रामस्थांनी बांधलेल्या कुमशेत येथील मारुती मंदिराचा १९५२ मध्ये मारुती मंदिर देवस्थान ट्रस्ट स्थापन करण्यात आला होता असे असताना गावातील काही जणांनी स्वतःच्या तसेच वारसाच्या हितासाठी ग्रामस्थांना विश्‍वासात न घेता तसेच शासनाची फसवणूक करून २०१४ मध्ये नवीन हनुमान मारुती देवस्थान ट्रस्ट स्थापन केला होता. नवीन ट्रस्टचे अध्यक्ष अरुण भगत, उपाध्यक्ष सुभाष डोके, सचिव शिवाजी डोके, खजिनदार मधुकर डोके हे पदाधिकारी तर अंबादास डोके, सचिन भगत, संतोष डोके हे सदस्य होते.
एक विश्‍वस्त मंडळ अस्तित्वात असताना नव्याने केलेले विश्‍वस्त मंडळ रद्द करावे यासाठी सह धर्मदाय आयुक्त पुणे यांच्याकडे अर्ज करण्यात आला होता.
त्यानुसार सह धर्मदाय आयुक्तांनी चौकशी अंती नवीन ट्रस्ट रद्द केला होता. या निर्णयाविरोधात नवीन ट्रस्ट स्थापन करणाऱ्यांनी मुंबई उच्च न्यायालयात तसेच दिल्ली येथील सर्वोच्च न्यायालयात दाद मागितली होती. सर्वोच्च न्यायालयाने अपील फेटाळून लावत ट्रस्ट रद्द केलेला आदेश कायम ठेवला आहे. डोके यांच्या वतीने सहधर्मदाय आयुक्त यांच्याकडे ॲड. साधना बाजारे मुंबई उच्च न्यायालय येथे ॲड. विनायक गाडेकर नवी दिल्ली सुप्रिम कोर्ट येथे ॲड. ए. एस. आव्हाड यांनी काम पाहिले.