वाल्हे, ता. २४ : वाल्हे (ता.पुरंदर) जवळील कामठवाडी परिसरात सलग तिसऱ्या दिवशी बिबट्याचे दर्शन झाल्याने शेतकऱ्यांसह कामगार वर्ग व महिलांमध्ये भीतीचे वातावरण निर्माण झाले आहे. दिवाळीच्या सणातही नागरिक अस्वस्थ असून, रात्रीच नव्हे तर दिवसाही शेतात जाण्यास शेतकरी आणि कामगार घाबरत आहेत. गुरुवारी (ता. २३) दुपारी दीडच्या सुमारास येथील शेतकरी रामदास नवले यांनी आपल्या मळ्यातील उसाच्या शेतात बिबट्याला पाहिल्याचे सांगितले. नवले हे नेहमीप्रमाणे शेतातील काम पाहण्यासाठी गेले असता, अचानक उसातून बिबट्या बाहेर पडल्याचे त्यांनी पाहिले. त्यांनी तत्काळ सावधगिरी
बाळगत तेथून पळ काढला आणि शेजारच्या शेतकऱ्यांना याबाबत माहिती देत सर्वांना सतर्क राहण्याचे आवाहन केले. कामठवाडी परिसरामध्ये ऊस, मका व ज्वारीच्या शेतीचा मोठा पट्टा असल्याने बिबट्याला आश्रय मिळतो आहे, अशी शक्यता व्यक्त केली जात आहे. सध्या संपूर्ण कामठवाडी परिसरात बिबट्याच्या दहशतीचे सावट पसरले असून शेतकरी, कामगार व महिलांनी वनविभागाने तत्काळ पावले उचलून नागरिकांच्या सुरक्षिततेची खात्री करावी, अशी मागणी जोर धरत आहे.