सणसवाडी, ता. १९ ः येथील भारत गॅस कंपनीच्या रस्त्याने जाणाऱ्या ज्येष्ठ नागरिकास पोलिस असल्याची बतावणी करून त्याच्या गळ्यातील पाच तोळे वजनाची सोन्याची चैन अज्ञात दोन चोरट्यांनी लुटल्याची घटना घडली. या प्रकरणी रामदास दरेकर (वय ७१) यांच्या फिर्यादीनुसार शिक्रापूर पोलिस ठाण्यात दोन अज्ञात इसमांवर गुन्हा दाखल केला आहे.

शिक्रापूर पोलिसांनी दिलेल्या माहितीनुसार, सणसवाडी (ता.शिरुर) येथील रामदास दरेकर हे आपल्या दुचाकीतून सणसवाडी चौकातून भारत गॅस कंपनीच्या रस्त्याने चाललेले असताना रस्त्यामध्ये दोघा इसमांनी त्यांना थांबविले. आम्ही पोलिस असून बाजूच्या कंपनीत चोरी झाली असून आम्हाला तुमची झडती घ्यायची असल्याचे सांगितले. त्यांच्याजवळील पाकीट, मोबाईल, गळ्यातील सोन्याची चैन रुमालात ठेवण्यास सांगितले. त्यानुसार दरेकर यांनी कृती केली असता, काही वेळातच या वस्तु लपेटलेला रुमाल पुन्हा रामदास यांच्या हातात देऊन दोघेजण निघून गेले. दरम्यान रामदास यांनी रुमाल उघडून पाहिला असता त्यामध्ये ठेवलेली पाच तोळे वजनाची सोन्याची चैन या तोतया पोलिसांनी लांबवल्याचे लक्षात आले. याबाबत रामदास बबन दरेकर (वय ७१, रा. सणसवाडी, ता. शिरूर) यांनी शिक्रापूर पोलिस ठाण्यात फिर्याद दिल्याने पोलिसांनी दोन अज्ञात इसमांवर गुन्हा दाखल केला. पुढील तपास पोलिस निरीक्षक दिपरतन गायकवाड यांच्या मार्गदर्शनाखाली सहायक पोलिस उपनिरीक्षक वेरणनाथ मुत्तनवार हे करत आहेत.