मंचर, ता. २० : ‘‘मंचर एसटी बसस्थानकात मोठ्या प्रमाणात खड्डे पडल्याने पाण्याची डबकी तयार झाली आहेत. प्रवाशांना बसस्थानकात ये-जा करताना धोक्याचे वाटत आहे. या पार्श्वभूमीवर बसस्थानकाच्या आवारात डांबरीकरण करण्यासाठी निधी दिला जाईल. त्यासाठी राज्य परिवहन महामंडळाने प्रस्ताव सादर करावा,’’ असे निर्देश माजी गृहमंत्री दिलीप वळसे पाटील यांनी दिले.
आंबेगाव तालुक्यातील एसटी सेवा व मंचर बसस्थानकाची दुरवस्था या पार्श्वभूमीवर मंचर (ता. आंबेगाव) येथे एसटीचे अधिकारी व प्रवासी प्रतिनिधींच्या झालेल्या बैठकीत वळसे पाटील बोलत होते. यावेळी घोडेगाव येथील एकात्मिक आदिवासी विकास प्रकल्प अधिकारी प्रदीप देसाई, पुणे विभाग नियंत्रक अरुण सिया, नारायणगाव आगारप्रमुख वसंतराव अरगडे, मंचर बसस्थानक प्रमुख साधना कालेकर, आदिवासी समाजाचे नेते सुभाषराव मोरमारे, संजय गवारी, सुषमा शिंदे उपस्थित होते.
यावेळी वळसे पाटील यांनी आंबेगाव तालुक्याच्या ५६ आदिवासी गावातील विद्यार्थिनींसाठी, आदिवासी विभागाच्या योजनेमार्फत १० एसटी बसचा प्रस्ताव राज्य परिवहन मंडळाने सादर करावा. या कामी प्रकल्प अधिकारी देसाई यांच्याशी समन्वय ठेवण्याचे काम एसटीच्या अधिकाऱ्यांनी करावे. भीमाशंकरला जाणाऱ्या भाविकांसाठी दर अर्ध्या तासाच्या अंतराने मंचर येथून एसटी सेवा उपलब्ध करून द्यावी. तसेच, पुणे ते मंचर शटल सेवा सुरू करण्याच्या सूचना दिल्या.
तांबडेमळा - मंचर एसटी आगाराचे सिमेंट काँक्रिटीकरण लवकर सुरू करावे. बसस्थानकावर असलेले इलेक्ट्रिक चार्जिंग केंद्र अद्याप कार्यान्वित झाले नसून, वीजजोडणीस अडथळे येत आहे. या कामी शेवाळवाडी ग्रामस्थांचे सहकार्य घ्यावे, असेही वळसे पाटील यांनी सूचित केले.

दिलीप वळसे पाटील यांनी एसटी सेवा अधिक सक्षम करण्याबाबत दिलेल्या सर्व सूचनांची तातडीने कार्यवाही केली जाईल. प्रवाशांना चांगली एसटी सेवा दिली जाईल. तांबडेमळा- मंचर आगाराप्रमाणेच शिवाजीनगर, राजगुरुनगर आगाराच्या एसटी गाड्यांमार्फतही भीमाशंकर मार्गावर एसटी गाड्यांची संख्या वाढविली जाईल.
- अरुण सिया, विभाग नियंत्रक, पुणे