​सासवड, ता. ७ : पुरंदर येथे प्रस्तावित आंतरराष्ट्रीय विमानतळासाठी होणाऱ्या भूसंपादन प्रक्रियेच्या संदर्भात पुणे जिल्हाधिकारी कार्यालयात सोमवारी (ता. ८) बैठकीचे आयोजन केले आहे. त्या बैठकीवर पारगाव मेमाणे (ता.पुरंदर) येथील स्थानिक शेतकऱ्यांनी बहिष्कार टाकण्याचा निर्णय घेतला आहे. जमिनी देण्यास विरोध कायम असल्याने, या बैठकीत चर्चेसाठी कोणीही प्रतिनिधी उपस्थित राहणार नाहीत, असे शेतकऱ्यांनी जिल्हाधिकाऱ्यांस कळवले आहे.

​याबाबत पारगावच्या सरपंच ज्योती मेमाणे यांनी जिल्हाधिकाऱ्यांना या निर्णयाबद्दल पत्र पाठवले आहे. मागील बैठकीमध्ये स्थानिक शेतकऱ्यांचे प्रतिनिधी उपस्थित असूनही, त्यांच्या भावना ऐकून घेतल्या नाहीत. त्याऐवजी, बैठकीत उपस्थित असलेले गुंतवणूकदार आणि जमीन खरेदी-विक्रीचे दलाल यांनाच बोलण्याची संधी मिळाल्याने शेतकरी नाराज झाले असल्याचे या पत्रात नमूद केले आहे.