पुणे, ता. ३१ : ‘‘कोथरूड विधानसभा मतदारसंघातील सर्व प्रभागांत आपण विविध विकासकामे केली आहेत. या विकासकामांच्या जोरावरच नागरिक मला पुन्हा कोथरूडकरांची सेवा करण्याची संधी देतील,’’ असा विश्वास महाविकास आघाडीचे उमेदवार चंद्रकांत मोकाटे यांनी पदाधिकाऱ्यांच्या बैठकीत व्यक्त केला.
कोथरूडमधील आशिष गार्डन येथे गुरुवारी (ता. ३१) शिवसेना उद्धव बाळासाहेब ठाकरे पक्ष, काँग्रेस, राष्ट्रवादी काँग्रेस शरदचंद्र पवार पक्ष, आम आदमी पक्ष आदी पक्षांच्या पदाधिकाऱ्यांची बैठक आयोजित करण्यात आली होती. या बैठकीत मोकाटे बोलत होते. बैठकीला काँग्रेसचे ज्येष्ठ नेते मोहन जोशी, काँग्रेसचे शहराध्यक्ष अरविंद शिंदे, प्रशांत बधे, गजानन थरकुडे, माजी नगरसेवक चंद्रकांत कदम, शिवा मंत्री, योगेश मोकाटे, स्वप्निल दुधाने आदी मान्यवर उपस्थित होते. महाविकास आघाडीतील सर्व पदाधिकारी, कार्यकर्त्यांनी मोकाटे यांना विजय मिळवून देण्यासाठी एकदिलाने काम करायचे बैठकीत ठरले. कोणत्याही परिस्थितीत महाविकास आघाडीचाच उमेदवार निवडून आणायचाच असे सर्व पदाधिकाऱ्यांनी मोठ्या आवाजात सांगत जोरदार घोषणाबाजी केली. मोकाटे म्हणाले, ‘‘मी आमदार असताना कोथरूड विधानसभा मतदारसंघात अनेक विकासकामे केली. या भागातील वाहतुकीची कोंडी दूर करण्यासाठी डीपी रस्ते तयार केले. मुठा कालव्याच्या बाजूने सेवा रस्ता करण्यासाठी प्राधान्य दिले.’’ माजी नगरसेवक चंद्रकांत कदम म्हणाले, ‘‘आपण केलेल्या विकासकामांच्या जोरावरच नागरिक मोकाटे यांना पुन्हा आमदार करतील.’’ अरविंद शिंदे म्हणाले, ‘‘महाविकास आघाडीच्या कार्यकर्त्यांनी चांगले काम व प्रचार करून मोकाटे यांना विजयी करण्यासाठी प्रयत्न करावेत.’’

कोथरूड : महाविकास आघाडीच्या बैठकीत बोलताना काँग्रेसचे शहराध्यक्ष अरविंद शिंदे