पुणे, ता. ३१ ः सावित्रीबाई फुले पुणे विद्यापीठ आणि मनःशक्ती केंद्र यांच्या वतीने ‘तारुण्यभान’ या विषयावर विद्यापीठातील विद्यार्थिनींसाठी नुकतीच कार्यशाळा पार पडली. कार्यशाळेचे आयोजन बहिःशाल शिक्षण मंडळ व ज्येष्ठ नागरिक सहायता कक्ष, विद्यार्थी विकास मंडळ यांच्या वतीने केले होते.
कार्यशाळेचे उद्‍घाटन कुलगुरू प्रा. सुरेश गोसावी यांच्या हस्ते झाले. या प्रसंगी प्र-कुलगुरू प्रा. पराग काळकर, प्र. कुलसचिव प्रा. ज्योती भाकरे, विद्यार्थी विकास मंडळाचे संचालक प्रा. अभिजित कुलकर्णी, प्रा. वर्षा तोडमल, मनःशक्ती केंद्राचे विश्वस्त प्रमोद शिंदे, मयूर चंदने, बहिःशाल शिक्षण मंडळ व ज्येष्ठ नागरिक सहायता कक्षाचे मानद संचालक प्रा. हरीश नवले उपस्थित होते. कुलगुरू प्रा. गोसावी यांनी सकारात्मक दृष्टिकोन कसा वृद्धिंगत केला जातो याविषयी तर प्रा. तोडमल यांनी ‘आरोग्य शरीराचे आणि मनाचे’ या विषयावर मार्गदर्शन केले. यावेळी शिंदे, चंदने, प्र-कुलगुरू प्रा. काळकर, व्यवस्थापन परिषदेचे राज्यपाल नियुक्त सदस्य रवींद्र शिंगणापूरकर यांनी विविध विषयांवर मार्गदर्शन केले.