पुणे, ता. ३१ ः दिवाळीतील महत्त्वाचा दिवस म्हणजे लक्ष्मीपूजन. शुक्रवारी (ता. १) घरोघरी तसेच व्यापारी व उद्योजकांकडून भक्तिभावाने लक्ष्मीपूजन केले जाते व ऐश्वर्य, संपत्ती, समृद्धिसाठी प्रार्थना केली जाते.
‘‘पूजेच्या वेळी ‘नमस्ते सर्वदेवानां वरदाऽसि हरिप्रिये। या गतिस्त्वत्प्रपन्नानां सा मे भूयात् त्वदर्चनात्।।’ असे म्हणून लक्ष्मीची प्रार्थना करावी आणि ‘धनदाय नमस्तुभ्यं निधिपद्माधिपायच। भवन्तु त्वत्प्रसादेन धनधान्यादिसम्पदः॥’, असे म्हणून कुबेराची प्रार्थना करावी. या पूजेत समृद्धीचे प्रतीक म्हणून साळीच्या लाह्या आवश्यक आहेत’’, असे ‘दाते पंचांगकर्ते’ मोहन दाते यांनी सांगितले.
शेतकऱ्यांसाठी ज्याप्रमाणे मार्गशीर्षातील वेळा अमावास्या शुभ आहे, त्याप्रमाणे व्यापारी वर्गासाठी अश्विनातील अमावास्या अर्थात लक्ष्मीपूजनाचा दिवस शुभ आहे. पुराणातील कथेप्रमाणे अश्विन अमावास्येला रात्री लक्ष्मी सर्वत्र संचार करीत असते. जेथे स्वच्छता, शोभा, आनंद आहे अशा ठिकाणी ती आकर्षित होते. म्हणून लक्ष्मीपूजनाचे दिवशी घर, दुकान झाडून, स्वच्छ करून, सुशोभित करून सूर्यास्तानंतर लक्ष्मी आणि कुबेर यांचे पूजन करून ऐश्वर्य, संपत्ती, समृद्धीसाठी प्रार्थना करावयाची असते.
लक्ष्मीपूजनासाठी दुपारी ३ ते ५.१५, सायंकाळी ६ ते ८.३० आणि रात्री ९.१० ते १०.४५ वाजेपर्यंत मुहूर्त आहेत, असे ‘दाते पंचांगकर्ते’ मोहन दाते यांनी सांगितले.
दरम्यान, साहित्य खरेदीसाठी गुरुवारी बाजारपेठांत ग्राहकांची गर्दी होती. वर्षभराच्या नोंदीसाठी लागणाऱ्या चोपड्या, पूजेसाठी फुले, उसाचे धाट, केळीचे खुंट, लक्ष्मीची प्रतिमा, लक्ष्मीची पावले आदी पूजेचे साहित्य खरेदी करत लक्ष्मी पूजनासाठी नागरिकांसह व्यापारी, संस्था, कंपन्या सज्ज झाल्या आहेत.