पुणे, ता. ३१ : सृष्टीचे निसर्ग सौंदर्य डोळ्यांनी पाहता येत नाही तरीही फुले, पाने, अंगावर पडत असलेले पाणी आणि पक्ष्यांचा किलबिलाट ऐकत त्यांनी निसर्ग सौंदर्याची उधळण प्रत्यक्ष अनुभवली. तसेच, कांदा भजी, पिठलं-भाकरी, साजूक तुपातला शिरा या गावरान मेनूवर देखील विद्यार्थिनींनी ताव मारला. बनेश्वर येथील मंदिरात मुलींनी दर्शन घेत आरती देखील केली.

निमित्त होते, शुक्रवार पेठेतील सेवा मित्र मंडळातर्फे दृष्टिहीन विद्यार्थिनींसाठी वेल्हे तालुक्यात आयोजित सहलीचे. कोथरूड येथील पुणे अंध मुलींची शाळा, वाघोली येथील लुई ब्रेल अंध अपंग कल्याणकारी संस्था, नऱ्हे येथील साई गुरू सेवा संस्था या संस्थांमधील दीडशे मुलींनी या सहलीत सहभाग घेतला. उपक्रमाचे आयोजन मंडळाचे अध्यक्ष पराग शिंदे, अमर लांडे, सचिन ससाणे, विक्रम मोहिते, सुरेश तरलगट्टी, अनुप थोपटे, कुणाल जाधव, प्रद्युम्न पंडित यांनी आयोजनात सहभाग घेतला. शिरीष मोहिते म्हणाले, ‘‘सहलीचा मनसोक्त आनंद विद्यार्थिनी घेतात, त्यामुळे दरवर्षी सहलीला येण्यास त्या उत्सुक असतात. या दृष्टिहीन मुलींना आनंद देण्यातच कार्यकर्त्यांना आनंद व ऊर्जा मिळत असते.’’