पुणे, ता. ३१ : लक्ष्मीपूजनासह दिवाळीच्या निमित्ताने आवश्यक असलेल्या विविध प्रकारच्या खरेदीसाठी पुणेकरांनी गुरुवारी सकाळपासूनच बाजारपेठेत गर्दी केली होती. रांगोळी, पणत्या, झेंडू-शेवंतीसह अनेक प्रकारची फुले, पूजेचे साहित्य घेण्यासाठी नागरिकांची रात्री उशिरापर्यंत उपनगरांसह शहराच्या मध्यभागातही वर्दळ होती.
वर्षभराच्या नोंदीसाठी लागणाऱ्या चोपड्या, पूजेसाठी फुले, उसाचे धाट, केळीचे खुंट, लक्ष्मीची प्रतिमा, लक्ष्मीची पावले आदी पूजेचे साहित्य मोठ्या प्रमाणात खरेदी करण्यात आले. घराघरांत तसेच कार्यालये, कारखाने, दुकानात उत्साहात लक्ष्मीपूजन केले जाते. कार्यालयांमध्ये आवश्यक असलेले पूजेचे साहित्य खरेदी करण्यासाठी बोहरी आळीमध्ये व्यापाऱ्यांची लगबग होती. व्यापाऱ्यांसह घरगुती पूजेसाठी लक्ष्मीचा फोटो, अगरबत्ती, कापूर, धूप तसेच विविध प्रकारची फुले घेण्यासाठी बाजारपेठेत गर्दी झाली होती. ऐनवेळी धावपळ नको म्हणून अनेकांनी गुरुवारीच पूजेच्या साहित्याची खरेदी केली. तसेच कपडे, फटाके खरेदीसाठीही नागरिकांची लगबग सुरू होती.
लक्ष्मी रस्त्यावर केलेल्या विद्युत रोषणाईमुळे नागरिकांच्या खरेदीच्या उत्साहात भर पडला. तसेच लक्ष्मी रस्ता, कुमठेकर रस्ता, टिळक रस्ता, महात्मा फुले मंडई परिसर, रविवार पेठेसह फर्ग्युसन रस्ता, जंगली महाराज रस्त्यासह औंध, बाणेर, खराडी, येरवडा, हडपसर आदी उपनगरांतही खरेदीसाठी नागरिकांची मोठ्या प्रमाणात गर्दी झाली होती. लक्ष्मीपूजनासाठी ठिकठिकाणी झेंडूच्या फुलांचे तोरण, लक्ष्मीची मूर्ती, केरसुणी, लाह्या बत्तासे आणि इतर पूजा साहित्याचे स्टॉल लागले होते. गेल्या महिनाभरापासून असलेली कपडे, इलेक्ट्रॉनिक वस्तू, फर्निचर दालने आणि सराफ पेठेत असलेली खरेदी गुरुवारी देखील कायम होती. त्यामुळे बाजारपेठेतील आर्थिक उलाढाली वाढल्याने व्यावसायिकांमध्ये उत्साह दिसला. लक्ष्मी पूजनानंतर शोभेच्या दारुची आतषबाजी केली जाते. त्यामुळे फटाके खरेदीसाठीही गर्दी होती.