पुणे, ता. २४ ः गॅस पुरवठा खंडित करण्याच्या बतावणीने प्रभात रस्ता भागातील एका तरुणाची सायबर चोरट्यांनी एक लाख रुपयांची फसवणूक केल्याचा प्रकार उघडकीस आला.
या प्रकरणी सायबर चोरट्यांवर गुन्हा दाखल करण्यात आला आहे. याबाबत एका तरुणाने डेक्कन पोलिस ठाण्यात फिर्याद दिली आहे. तक्रारदार तरुण हा प्रभात रस्त्यावरील एका सोसायटीत राहायला आहे. पोलिसांनी दिलेल्या माहितीनुसार, सायबर चोरट्यांनी तरुणाच्या मोबाईल क्रमांकावर संदेश पाठविला. ‘एमएनजीएल’चे देयक थकले असून, देयक न भरल्यास गॅस पुरवठा खंडित करण्यात येईल, अशी बतावणी चोरट्यांनी केली. त्यानंतर चोरट्यांनी तरुणाच्या मोबाईल क्रमांकावर एका ॲप्लिकेशनची फाइल पाठविली. तरुणाने ही फाइल उघडताच मोबाईलमधील गोपनीय माहिती चोरट्यांनी चोरली. तरुणाचा मोबाईल क्रमांक बँक खात्याला जोडण्यात आला आहे. चोरट्यांनी बँक खात्यातून एक लाख एक हजार रुपये काढून घेतले. वरिष्ठ पोलिस निरीक्षक गिरीशा निंबाळकर गुन्ह्याचा तपास करत आहेत.