पुणे, ता. २७ ः परगावी निघालेल्या प्रवासी महिलेच्या पिशवीतून चोरट्यांनी सहा लाख २९ हजार रुपयांचे सोन्याचे दागिने लांबविल्याची घटना हडपसर भागात घडली. याबाबत एका महिलेने हडपसर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिला मूळच्या सोलापूरच्या आहेत. दिवाळीनिमित्त त्या पुण्यात नातेवाइकांकडे आल्या होत्या. रविवारी (ता. २६) सकाळी नऊच्या सुमारास त्या पुणे-सोलापूर रस्त्यावरील रवीदर्शन थांब्यावर सोलापूरकडे जाणाऱ्या बसची वाट पाहत थांबल्या होत्या. बसमध्ये प्रवेश करताना चोरट्यांनी त्यांच्या पिशवीतून सोन्याचे दागिने लांबविले.
दरम्यान, कात्रज पीएमपी स्थानकात प्रवासी महिलेच्या गळ्यातील ७५ हजारांची सोनसाखळी चोरट्यांनी लांबविल्याची घटना घडली. याबाबत एका महिलेने भारती विद्यापीठ पोलिस ठाण्यात फिर्याद दिली आहे. तक्रारदार महिला नगर रस्त्यावरील चंदननगर भागात राहायला आहेत. २४ ऑक्टोबरला सायंकाळी साडेपाचच्या सुमारास त्या बसमध्ये प्रवेश करत होत्या. त्यावेळी चोरट्यांनी त्यांच्या गळ्यातील सोनसाखळी लांबविली.