पुणे, ता. १ : औषधनिर्माणशास्त्रातील बी.फार्म अभ्यासक्रमाच्या तिसऱ्या फेरीत तीन हजार ६१५ विद्यार्थ्यांनी प्रवेश निश्चित केले आहेत. या फेरीत सहा हजार ९२१ विद्यार्थ्यांची प्रवेशासाठी निवड झाली असून, त्यापैकी ४८ टक्के विद्यार्थ्यांनी प्रवेश घेतला आहे.
चार वर्षाच्या पूर्णवेळ बी. फार्म अभ्यासक्रमाच्या प्रथम वर्षाच्या प्रवेश प्रक्रियेची तिसरी फेरी नुकतीच संपली आहे. बी. फार्म अभ्यासक्रमाच्या प्रवेशासाठी सीईटीमार्फत एकूण चार केंद्रीय प्रवेश फेऱ्या राबविण्यात येत असून, त्यातील तीन फेऱ्या पूर्ण झाल्या आहेत. तर संस्थास्तरीय प्रवेश फेरी देखील राबविण्यात येणार आहेत.
राज्यात बी. फार्म अभ्यासक्रमाच्या प्रवेशासाठी एकूण ४६ हजार १०९ जागा उपलब्ध आहेत. त्यापैकी १७ हजार ६९० जागा तिसऱ्या फेरीनंतरही रिक्त आहेत. या अभ्यासक्रमाच्या पहिल्या कॅप फेरीत २९ हजार १६६ विद्यार्थ्यांना प्रवेशाची संधी देण्यात आली होती. त्यापैकी १६ हजार ६७० विद्यार्थ्यांनी प्रवेश निश्चित केला. तर, दुसऱ्या फेरीत आठ हजार १३४ आणि तिसऱ्या फेरीत तीन हजार ६१५ विद्यार्थ्यांनी प्रवेश निश्चित केला आहे. तिसऱ्या फेरीनंतर आता बी. फार्म अभ्यासक्रमाच्या प्रवेशासाठी एकूण ४६ हजार १०९ जागा उपलब्ध आहेत, अशी माहिती सीईटी कक्षातर्फे देण्यात आली आहे.
बी.फार्म अभ्यासक्रमाच्या चौथ्या फेरीत विद्यार्थ्यांना येत्या सोमवारपर्यंत (ता. ३) ऑनलाइन अर्ज निश्चिती आणि पसंतीक्रम नोंदविता येणार आहेत. चौथ्या फेरीची तात्पुरती निवड यादी येत्या गुरुवारी (ता. ६) जाहीर होणार आहे. यादीत निवड झालेल्या विद्यार्थ्यांना मिळालेल्या महाविद्यालयात प्रवेशासाठी ७ ते १० नोव्हेंबरपर्यंत मुदत देण्यात आली आहे.