पुणे, ता. १२ : महिला आणि युवकांचा सहकार क्षेत्रातील सहभाग आणि भूमिका, कृत्रिम बुद्धिमत्ता, जागतिक तापमानवाढ व हरित उपक्रम, सायबर सुरक्षा, पुनर्विकास व स्वयं-पुनर्विकास, सहकार संवाद, मानीव अभिहस्तांतर आदी विषयांवर दोनदिवसीय परिसंवाद व प्रशिक्षण कार्यक्रमाचे आयोजन महाराष्ट्र राज्य सहकारी गृहनिर्माण महासंघ आणि सहकार खाते यांच्यातर्फे करण्यात आला आहे. हा कार्यक्रम मंगळवारी (ता. १८) व बुधवारी (ता. १९) गोव्यामधील कोलवा (मडगाव) येथे येथे होणार आहे.
‘सहकारातून एक उत्तम जग घडवूया’ हे या वर्षीचे घोषवाक्य असून, हे प्रशिक्षण प्रत्यक्ष व ऑनलाइन पद्धतीने होणार आहे, तसेच या माध्यमातून देशा-परदेशातील सुमारे एक लाख व्यक्तींपर्यंत समाज माध्यमातून पोहोचणार आहे. कार्यक्रमाचे उद्‍घाटन माजी केंद्रीय वाणिज्य आणि ऊर्जामंत्री सुरेश प्रभू यांच्या हस्ते होणार आहे. प्रमुख पाहुणे म्हणून केंद्रीय राज्य सहकार मंत्री आणि नागरी उड्‌डाण वाहतूक राज्यमंत्री मुरलीधर मोहोळ, डॉ. अच्युत गोडबोले, नॅशनल कॉपरेटिव्ह युनियन ऑफ इंडिया, नॅशनल कॉपरेटिव्ह हाउसिंग फेडरेशन (एनसीएचएफ), त्रिभुवन विश्ववि‌द्यालय, वैकुंठ मेहता राष्ट्रीय सहकारी प्रबंध संस्था, डॉ. विखे पाटील संस्थान, यशदा आदी संस्थांचे प्रतिनिधी उपस्थित राहणार आहेत.
--------------