पुणे, ता. ७ : थंड वारे, कोरडी व प्रदूषित हवा या कारणांमुळे शहरात गेल्या काही दिवसांपासून सर्दी आणि खोकल्याच्या रुग्णांमध्ये वाढ दिसून येत आहे. वातावरणात अचानक वाढलेला गारठा आणि हवामानातील तीव्र बदल यामुळे नागरिकांना विशेषतः घशाचा संसर्ग वाढल्याने रुग्णांना खोकल्यासह घसा खवखवणे, वेदना होणे, कफ पडणे ही लक्षणे जाणवत आहेत. लहान मुलांमध्येही संसर्गाचे प्रमाण दिसून येत आहे.
गेल्या दोन आठवड्यापासून वातावरणात थंडी वाढली आहे. डॉक्टरांच्या निरीक्षणानुसार, वाढलेला गारठा आणि कोरडी हवा त्यामुळे घशाचा संसर्ग वाढत आहे. थंडीत त्वचा कोरडी पडते व घशाच्या संसर्गाच्या तक्रारी वाढतात. त्यातच ताप येणे, अंगदुखी, थकवा ही लक्षणे दिसून येत आहेत.
याबाबत जनरल प्रॅक्टिशनर डॉ. प्राजक्ता गायकवाड म्हणाल्या, ‘‘सध्या डेंगी किंवा इतर संसर्गजन्य आजारांचे रुग्ण कमी आहेत. परंतु, घशाच्या संसर्गाच्या तक्रारी वाढल्या आहेत. तसेच श्वसन मार्गातील संसर्ग वाढला आहे. सर्दी, खोकला, कफ याचे रुग्ण वाढले आहेत. त्यासाठी गरम पाण्याने गुळण्या करणे, वाफ घेणे हे प्राथमिक उपाय संसर्ग कमी करण्यास मदत करू शकतात. घरगुती उपचारानंतर ४-५ दिवसांनंतरही आराम न वाटल्यास त्वरित डॉक्टरांना दाखवा, असे आवाहनही डॉ. गायकवाड यांनी केले.
..................
‘‘साधारणपणे सर्दी, फ्लू किंवा हंगामी संसर्गामुळे ताप येतो. मात्र, कधी कधी हा ताप अधिक गंभीर समस्येचे संकेत देऊ शकतो. ‘ह्यूमन हर्पिसव्हायरस-६’ अर्थात ‘एचएचव्ही ६’ हा विषाणू दोन वर्षांपर्यंत जवळपास सर्व मुलांना संक्रमित करतो. मुलांना येणारा ताप बहुतेक वेळा साधा असू शकतो. मात्र, तापाबरोबर झटके, अशक्तपणा किंवा अतिशय झोप येणे अशी लक्षणे दिसल्यास तत्काळ वैद्यकीय मदत घ्या.
-डॉ. सचिन शाह, बालरोगतज्ज्ञ
............
काय काळजी घ्याल?
- हवामानानुसार गरम कपडे परिधान करा.
- शक्यतो कोमट केलेले पाणी प्या
- सकाळी-सायंकाळी मीठ टाकून कोमट पाण्याने गुळण्या करा.
- गरम पाण्याची वाफ घ्या, त्याने सर्दी, श्वसनमार्गातील संसर्ग कमी होण्यास मदत होते.
- आइस्क्रीम, कोल्ड ड्रिंक्स, फ्रिजमधील पाणी पिऊ नका
- संसर्ग पसरत असल्याने गर्दीत जाणे टाळा
- बाहेर जाताना मास्क वापरा.
- साबणाने वारंवार हात धुवा किंवा सॅनिटायझरचा वापर करा.
- पुरेशा झोपेबरोबरच गरम सूप, हळदीचे दूध, काढा आणि पौष्टिक आहार घ्या
- धूळ-धूर असलेल्या ठिकाणी मास्क वापरा
- लहान मुलांना थंडी लागू नये म्हणून गरम कपडे, मोजे, टोपी वापरा.
................
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.