पुणे, ता. २० ः प्रधानमंत्री पीक विमा योजनेसाठी खरीप हंगामात राज्यातील २२ लाख ९३ हजार ६७२ शेतकऱ्यांनी अर्ज केले आहेत. यामध्ये लातूर विभाग आघाडीवर आहे, तर जिल्ह्यामध्ये सर्वाधिक म्हणजे तीन लाख ५६ हजार १९६ अर्ज हे बीड जिल्ह्यातील शेतकऱ्यांनी केले आहेत.
नैसर्गिक आपत्तीमुळे नुकसानीपासून शेतकऱ्यांना आर्थिक संरक्षण देण्याच्या दृष्टिकोनातून राज्यात प्रधानमंत्री पीक विमा योजना राबविण्यात येत आहे. खरीप हंगामातील भात, खरीप ज्वारी, बाजरी, नाचणी, मका, तूर, मूग, उडीद, सोयाबीन, भुईमूग, तीळ, कारळे, कापूस आणि कांदा या अधिसूचित पिकांसाठी शेतकऱ्यांना अर्ज विम्यासाठी अर्ज करता येणार आहे. राज्यात सध्या विम्यासाठी अर्ज करणाऱ्या शेतकऱ्यांचा वेग वाढला आहे. मागील चोवीस तासांमध्ये दोन लाख ३६ हजार २९५ शेतकऱ्यांनी अर्ज केले आहेत. आत्तापर्यंतच्या विम्यातून १४ लाख पाच हजार ३६६ हेक्टरवरील पिकाचा विमा उतरविला आहे. यातून सात हजार ५६४ कोटी रुपयांची रक्कम विमा संरक्षित झाली आहे. यात शेतकऱ्यांचा विमा हप्ता १३१ कोटी असून राज्य आणि केंद्राचा प्रत्येकी विमा हप्ता २४० कोटी रुपयांचा हप्ता देणार आहे. एकूण विमा हप्त्याची रक्कम ही ६१३ कोटी रुपये एवढी झाली आहे. विमा हप्ता भरण्याची अंतिम मुदत ३१ जुलैपर्यंत असून एखाद्या अर्जदाराने बोगस किंवा फसवणूक करून विमा योजनेचा लाभ घेण्याचा प्रयत्न केल्यास त्यांना पुढील किमान पाच वर्ष काळ्या यादीत टाकून सरकारच्या कोणत्याही योजनेचा लाभ मिळणार नसल्याचे कृषी विभागाकडून सांगण्यात आले आहे.

लातूर विभागातून सर्वाधिक अर्ज
विम्यासाठी अर्ज करण्यासाठी लातूर विभागाने आघाडी घेतली आहे. लातूर विभागातून आत्तापर्यंत आठ लाख २६ हजार १४६ जणांनी अर्ज दाखल केले आहेत; तर छत्रपती संभाजीनगर विभागातून सहा लाख ८३ हजार ५६६ शेतकऱ्यांनी अर्ज केले आहेत, तर पुणे विभागातून एक लाख ४४ हजार शेतकऱ्यांनी अर्ज केले आहेत.

आत्तापर्यंत बावीस लाख शेतकऱ्यांनी सहभाग नोंदवला आहे. पीकविमा योजनेत सहभाग घेण्यासाठी बारा दिवस शिल्लक राहिले आहेत. शेतकऱ्यांनी जास्तीत जास्त सहभाग नोंदवावा.
- वैभव तांबे, मुख्य सांख्यिक, कृषी आयुक्तालय

दृष्टिक्षेपात
विभाग -- शेतकऱ्यांचे अर्ज
कोकण -- १८,११४
नाशिक -- २,०२,२६७
पुणे -- १,४४,९९८
कोल्हापूर -- ४१,७८५
छत्रपती संभाजीनगर -- ६,८३,५६६
लातूर -- ८,२६,१४६
अमरावती -- २,९७,५४०
नागपूर -- ७९,२५६
एकूण -- २२,९३,६७२