वाघोली, ता. ३१ : कुरिअर पार्सलमध्ये ड्रग्ज सापडल्याची धमकी देवून सायबर चोरट्यांनी ३२ लाख रुपये उकळल्याची घटना घडली. या प्रकरणी गुन्हा दाखल करण्यात आला आहे. पोलिसांनी दिलेल्या माहितीनुसार, वाघोली-राहू रस्त्यालगत राहणाऱ्या ३६ वर्षीय व्यक्तीला संपर्क करून कुरिअर कंपनीतून बोलत असल्याचे सांगितले. तुमच्या नावाने असलेल्या पार्सलमध्ये ४५० ग्रॅम ड्रग्ज सापडले आहे. मनी लाँड्रिंगची भीती दाखवून मोबाईल अॅपद्वारे ३० लाख रुपये कर्ज काढण्यास सांगून कर्जाचे व खात्यातील शिल्लक असे ३२ लाख ५० रुपये लंपास करून ऑनलाइन फसवणूक केली. तुमचे पैसे परत मिळतील असे त्या व्यक्तीला सांगण्यात आले होते. मात्र पैसे परत मिळत नसल्याचे लक्षात आल्यानंतर त्याने लोणीकंद पोलिस ठाण्यात फिर्याद दिली.