प्रणाली कोद्रे
आयपीएल 2024 स्पर्धेच्या 19 व्या सामन्यात 6 एप्रिल रोजी रॉयल चॅलेंजर्स बेंगळुरू संघाला राजस्थान रॉयल्स संघाने 6 विकेट्सने पराभवाचा धक्का दिला.
राजस्थान रॉयल्सला विजय मिळवून देण्यात जॉस बटलरने शतक करत मोलाचा वाटा उचलला. विशेष म्हणजे हा बटलरचा 100 वा आयपीएल सामना होता.
या सामन्यात बटलरने 58 चेंडूत 9 चौकार आणि 4 षटकारांसह 100 धावांची नाबाद खेळी केली.
त्यामुळे बटलर 100 व्या आयपीएल सामन्यात शतक करणारा केएल राहुलनंतरचा दुसराच खेळाडू ठरला आहे.
केएल राहुलने 2022 मध्ये लखनऊ सुपर जायंट्स संघाकडून खेळताना 100 वा आयपीएल सामना मुंबई इंडियन्सविरुद्ध खेळला होता, ज्यात त्याने नाबाद 103 धावांची खेळी केली होती.
दरम्यान, 100 व्या आयपीएल सामन्यात सर्वोच्च खेळी करणाऱ्या फलंदाजांमध्ये केएल राहुल आणि बटलर यांच्यापाठोपाठ फाफ डू प्लेसिस आहे. त्याने 2021 आयपीएलच्या अंतिम सामन्यात चेन्नई सुपर किंग्सकडून कोलकाता नाईट रायडर्सविरुद्ध 59 चेंडूत 86 धावांची खेळी केली होती.
या विक्रमाच्या यादीत चौथ्या क्रमांकावर डेव्हिड वॉर्नर असून त्याचा 2016 आयपीएलचा अंतिम सामना 100 वा सामना होता. या सामन्यात त्याने 38 चेंडूत 69 धावांची खेळी केली होती.
पाचव्या क्रमांकावर मुरली विजय असून त्याने 2016 मध्ये पंजाब किंग्सकडून रायझिंग पुणे सुपर जायंट्सविरुद्ध 100वा आयपीएल सामना खेळला होता. या सामन्यात त्याने 41 चेंडूत 59 धावा केल्या होत्या.