Mansi Khambe
सध्या लहानग्यांपासून मोठ्यांपर्यंत लॅपटॉप किंवा कॉम्प्युटर वापरतात. शाळेतील विद्यार्थ्यांसह कामावर जाणारे कर्मचारी दररोज कॉम्प्युटरचा वापर करतात.
मात्र अनेकांना कॉम्प्युटरच्या कीबोर्डवर किती बटण असतात याचा आकडा माहित नसेल. तर कीबोर्डवर एकूण १०४ बटण असतात. परंतु यातील दोन बटनांवर आडव्या रेषा असतात.
कॉम्प्युटरच्या कीबोर्डवर F आणि J या बटनांवर खाली ही आडवी रेष मारलेली असते. जी हाताला लागावी अशी या बटणावरच दिलेली असते.
पण त्या रेषा का असतात आणि त्या F आणि J या बटनांवरच का दिले आहेत? हे तुम्हाला माहित आहे का? जाणून घ्या
F आणि J या बटनांवरील आडव्या रेषांना टॅक्टाइल गाईड्स म्हणतात. कीबोर्डकडे न पाहता टाइप करताना तुमची बोटे योग्य ठिकाणी ठेवण्यास मदत करण्यासाठी त्या खुणा देण्यात आल्या आहेत.
दरोरोज कीबोर्डवर काम करत असल्यामुळे आता लोकांना कीबोर्डकडे न पाहता टाइप करणे सोपे झाले आहे. मात्र आपल्या बोटांना नकळत या आडव्या रेषा मदत करत असतात.
QWERTY कीबोर्ड लेआउटमध्ये, डाव्या हाताची तर्जनी 'F' वर आणि उजव्या हाताची तर्जनी 'J' वर ठेवली जाते. उर्वरित बोटे त्यांच्या संबंधित मुख्य पंक्तीच्या बटणांवर ठेवली जातात. तर डाव्या हाताची बोटे A-S-D-F आणि उजव्या हाताची बोटे J-K-L अशा रितीने ठेवली जातात.
यामुळे तुम्ही थेट स्क्रीनवर लक्ष केंद्रित करू शकता व फास्ट टायपिंग करू शकता.
त्याचबरोबर बोटे सतत योग्य ठिकाणी ठेवल्याने मेंदू आणि हाताला त्याची सवय होते आणि स्नायूंची स्मरणशक्ती वाढते. तसेच यामुळे दुखापत किंवा ताण येण्याचा धोका कमी होतो.