प्रणाली कोद्रे
इंडियन प्रीमियर लीग २०२४ स्पर्धेला २२ मार्चपासून सुरुवात झाली. पहिल्याच सामन्यात चेन्नई सुपर किंग्सने रॉयल चॅलेंजर्स बेंगळुरूला ६ विकेट्सने पराभूत केले.
चेन्नईच्या या विजयात 24 वर्षीय न्यूझीलंडचा अष्टपैलू रचिन रविंद्रनेही मोलाचा वाटा उचलला.
विशेष म्हणजे रचिनने या सामन्यातून चेन्नई सुपर किंग्सकडून आयपीएलमध्ये पदार्पण केले आहे.
त्याने या सामन्यात आधी क्षेत्ररक्षणात प्रभाव पाडला. त्याने आधी फाफ डू प्लेसिसचा जमीनीलगत एक अफलातून झेल घेतला. त्यानंतर विराटचाही झेल त्याने आणि अजिंक्य रहाणेने मिळून पूर्ण केला.
क्षेत्ररक्षणात प्रभाव पाडल्यानंतर रचिनने फलंदाजीतही त्याची छाप पाडली.
त्याने आक्रमक खेळताना १५ चेंडूत ३७ धावांची खेळी केली. या खेळीत त्याने ३ चौकार आणि ३ षटकार मारले.
त्याने आधी कर्णधार ऋतुराजबरोबर सलामीला ३८ आणि नंतर रहाणेबरोबर ३३ धावांची भागीदारी केली.
त्याच्या या खेळीमुळे त्याला इलेक्ट्रिक स्ट्रायकरचा पुरस्कारही देण्यात आला.