प्रणाली कोद्रे
आयपीएल 2024 स्पर्धेतील 35 व्या सामन्यात सनरायझर्स हैदराबादने दिल्ली कॅपिटल्सविरुद्ध 67 धावांनी विजय मिळवला.
याच सामन्यात सनरायझर्स हैदराबादने एका मोठ्या विक्रमाला गवसणी घातली.
सनरायझर्स हैदराबादचे सलामीवीर ट्रेविस हेड आणि अभिषेक शर्मा यांनी संघाला अवघ्या 5 षटकातच 100 धावांचा टप्पा पार करून दिला होता.
त्यामुळे आयपीएलच्या इतिहासात सर्वात कमी षटकात संघाच्या 100 धावा होण्याचा विक्रम सनरायझर्स हैदराबादच्या नावावर नोंदवला गेला.
यापूर्वी हा विक्रम चेन्नई सुपर किंग्स आणि कोलकाता नाईट रायडर्स संघाच्या नावावर होता.
चेन्नई सुपर किंग्सने 2014 साली 6 षटकातच पंजाब किंग्सविरुद्ध झालेल्या सामन्यात 100 धावा पूर्ण केल्या होत्या.
तसेच कोलकाता नाईट रायडर्सने 2017 साली रॉयल चॅलेंजर्स बेंगळुरूविरुद्ध झालेल्या सामन्यात 6 षटकात 100 धावा पार केल्या होत्या.
या विक्रमाच्या यादीत चौथ्या क्रमांकावरही चेन्नई सुपर किंग्स असून त्यांनी 2015 मध्ये मुंबई इंडियन्सविरुद्ध 6.5 षटकात 100 धावांचा टप्पा पार केला होता.
तसेच सनरायझर्स हैदराबादने 2024 मध्येच मुंबई इंडियन्सविरुद्ध 7 षटकात 100 धावांचा टप्पा पार केला होता.