Amit Ujagare (अमित उजागरे)
राज्यात NEP अंतर्गत त्रिभाषा सुत्रानुसार हिंदी भाषा पहिलीपासून बंधनकारक करण्यात आली होती, याविरोधात डॉ. दीपक पवार हे आक्रमकपणे लढा देत आहेत.
हे धोरण लागू झाल्यास मराठी भाषेची स्थिती कशी बिकट होऊ शकते हे त्यांनी सप्रमाण वारंवार आपल्या मुलाखतींतून लेखांमधून मांडलं आहे.
त्यांनी सप्रमाणं काही तथ्ये मांडल्यानंतर त्यांच्याच मुद्द्यांवर इतर सामाजिक, सांस्कृतीक आणि राजकीय संघटनांनी आक्रमकपणे मराठीची बाजू लावून धरत हिंदीला कडाडून विरोध केला.
डॉ. दीपक पवार हे मुंबई विद्यापीठात राज्यशास्त्राचे प्राध्यापक आहेत. मराठी भाषेचा मुद्दा हा सामाजिक, राजकीय आणि शैक्षणिकदृष्ट्या किती महत्वाचा आहे हे त्यांनी वारंवार सांगितलं.
मराठी भाषेसाठी काम करणाऱ्या 'मराठी अभ्यास केंद्रा'चे ते सध्या अध्यक्ष आहेत. मराठी भाषा, समाज आणि संस्कृती यांसाठी विधायक चळवळ उभारू पाहणाऱ्या कार्यकर्त्यांचं हे संघटन आहे.
मुंबई पदवीधर मतदारसंघातून आमदारकीसाठी त्यांनी अपक्ष म्हणून निवडणूकही लढवली आहे.
हिंदी भाषा बंधनकारक करण्याचा मुद्द्यावर डॉ. दीपक पवार यांनी सातत्यानं विविध चॅनेलवरुन सरकारचा हा निर्णय कसा चुकीचा आहे? हे सांगण्याचा प्रयत्न केला.
त्याचबरोबर महाराष्ट्रातील मराठी जनतेवर हिंदी भाषा लादणं यामागं राजकीय षडयंत्र असल्याचा आरोपही त्यांनी केला होता.