तुम्ही पॅन आधारला लिंक केले का? नाहीतर... 

नवी दिल्ली: येत्या 31 मार्च 2019 पर्यंत पॅन कार्ड आधार कार्डला लिंक करणे गरजेचे आहे. कारण आधारला पॅन लिंक न केल्यास आयटी कलम 139 एएअंतर्गत ते निष्क्रिय समजले जाणार आहे. सेंट्रल बोर्ड ऑफ डायरेक्ट टॅक्सने (सीबीडीटी) पॅन कार्ड आधारला लिंक करण्याची मर्यादा वाढवून 31 मार्च 2019पर्यंत वाढविली आहे. याआधी 30 जून 2018 पर्यंत ते लिंक करणे अपेक्षित होते.  सर्वोच्च न्यायालयाने देखील पॅन कार्ड आधारशी जोडणे अनिवार्य असल्याचा आदेश दिला आहे.

पॅन कार्ड आधार कार्डशी लिंक केले नाहीतर पॅन कार्ड निष्क्रिय समजले जाईल. शिवाय ऑनलाइन ITR फाइल (आयटीआर) करता येणार नाही. परिणामी प्राप्तिकर विभागाकडून देखील आयटीआर वेळेत भरणा न केल्याने नोटीस पाठविली जाऊ शकते. 

कसे कराल आधार-पॅन लिंक? 
पहिल्यांदा गुगल क्रोम ब्राऊझरवरून प्राप्तिकर विभागाची ई-फायलिंग www.incometaxindiaefiling.gov.in या संकेतस्थळाला भेट द्या. संकेतस्थळाला भेट दिल्यानंतर डाव्या बाजूला असलेल्या लाल रंगाच्या लिंक आधार या टॅबवर क्लिक करा. जर आपले खाते नसेल तर आधी रजिस्ट्रेशन करावे लागेल. रजिस्ट्रेशन झाल्यानंतर निळ्या अक्षरात दिलेल्या टॅबवर क्लिक करून प्रोफाइल सेटिंग निवडा. तिथे दिलेल्या सेक्शनमध्ये आधार नंबर आणि कॅप्चा कोड भरा. सर्व माहिती भरल्यानंतर खाली दिलेल्या लिंक आधार टॅबवर क्लिक करा.

मोबाईलच्या माध्यमातूनही कसे कराल आधार-पॅन लिंक?
प्राप्तिकर विभागाने त्यासाठी 567678 किंवा 56161 हे दोन क्रमांक उपलब्ध करून दिले आहेत. या नंबरवर एसएमएस करून आपण आधारला पॅन कार्ड लिंक करू शकता.