विकासाबाबत रिझर्व्ह बॅंकेला चिंता

मुंबई - जागतिक घडामोडींच्या पार्श्‍वभूमीवर चालू वर्षातील विकास- दराबाबत रिझर्व्ह बॅंकेने चिंता व्यक्त केली आहे. नुकत्याच पार पडलेल्या पतधोरण समितीच्या बैठकीतील इतिवृत्तात चीनसह प्रमुख उदयोन्मुख अर्थव्यवस्थांच्या विकासदरातील घसरण चिंताजनक असल्याचे बॅंकेने म्हटले आहे. 

चलनवाढीने तळ गाठल्यामुळे रिझर्व्ह बॅंकेने गत पतधोरणात रेपो दर पाव टक्‍क्‍याने कमी केला होता. पतधोरणातील तटस्थ भूमिकेने धोरण लवचिक असून, शाश्‍वत विकासातील समस्या दूर करण्यात फायदेशीर ठरेल, असे मत रिझर्व्ह बॅंकेचे गव्हर्नर शक्‍तिकांत दास यांनी व्यक्त केले आहे. जागतिक अर्थव्यवस्थेचा विकासदर खुंटला आहे. व्यापारी संघर्ष आणि ‘ब्रेक्‍झिट’चा तिढा यामुळे जागतिक विकासदरावर परिणाम होईल, असे दास यांनी म्हटले आहे.

कच्च्या तेलाच्या किमतींमधील घसरण दिलासादायक आहे. मात्र निर्यात वाढ जेमतेम झाल्याने त्यातील फायदा मर्यादित आहे. २०१९-२० या वर्षात विकासदर ७.४ टक्के राहील, असा अंदाज व्यक्त केला आहे. पहिल्या सहामाहीत तो ७.२ टक्के ते ७.४ टक्‍के आणि तिसऱ्या तिमाहीत तो ७.५ टक्के राहील, असा अंदाज बॅंकेने व्यक्त केला आहे. नजीकच्या काळात पुरवठ्यात वाढ झाली, तर अन्नधान्यांच्या किमती कमीच राहतील आणि चलनवाढ नियंत्रणात राहील, असा विश्‍वास दास यांनी व्यक्त केला.