व्याजदर अर्धा टक्का वाढण्याची शक्यता

मुंबई : महागाई नियंत्रणात ठेवण्यासाठी अमेरिकी फेडरल रिझर्व्हसह स्विस बँक आणि ब्रिटनच्या मध्यवर्ती बँकेने केलेल्या व्याजदरवाढीच्या उपायाप्रमाणे भारतीय रिझर्व्ह बँकही आगामी पतधोरण बैठकीत व्याजदरात किमान अर्धा टक्का वाढ करण्याची दाट शक्यता बहुतांश अर्थतज्ज्ञांनी व्यक्त केली आहे. रॉयटर्सने सर्वेक्षण केलेल्या ५१ पैकी २६ तज्ज्ञांनी रिझर्व्ह बँक अर्धा टक्का दरवाढीसह रेपो दर ५.९० टक्क्यांवर नेण्याची तर २० तज्ज्ञांनी व्याजदरात ०.३५ टक्क्यांनी वाढ होण्याची शक्यता व्यक्त केली आहे.

डॉलरच्या तुलनेत रुपयाची सातत्याने घसरण होत असून २३ सप्टेंबर रोजी डॉलरच्या तुलनेत रुपया ८१च्या पुढे गेला होता. तसेच देशात किरकोळ महागाईचा दरही सात टक्क्यांवर पोहोचला आहे. या परिस्थितीवर नियंत्रण ठेवण्यासाठी रिझर्व्ह बँकही ३० सप्टेंबरच्या बैठकीत रेपो दरात अर्धा टक्क्याची वाढ करेल, असे तज्ज्ञांचे मत आहे.