अखेर महाबॅंक सावरली

पुणे - मार्चअखेर संपलेल्या चौथ्या तिमाहीत बॅंक ऑफ महाराष्ट्रला ७२.३८ कोटी रुपयांचा नफा झाला आहे. बॅंकेचे व्यवस्थापकीय संचालक आणि मुख्य कार्यकारी अधिकारी ए. एस. राजीव यांनी चौथ्या तिमाहीअखेरचे आर्थिक निकाल आज जाहीर केले. या वेळी बॅंकेचे कार्यकारी संचालक ए. सी. राऊत आणि कार्यकारी संचालक हेमंत टम्टा उपस्थित होते. 

गेल्या वर्षी चौथ्या तिमाहीत बॅंकेला ११३.४९ कोटी रुपयांचा तोटा झाला होता. मागील आर्थिक वर्षात बॅंकेला ४,७८४ कोटी रुपयांचा तोटा झाला असून, त्याआधीच्या आर्थिक वर्षात तो १,१४६ कोटी रुपये होता. आज जाहीर केलेल्या आकडेवारीनुसार, चौथ्या तिमाहीत बॅंकेचा कार्यान्वयन नफा ५०१ कोटी असून, गेल्या वर्षी तो ५४७ कोटी रुपये होता. व्याजातून मिळणाऱ्या उत्पन्नात १३.४७ टक्‍क्‍यांची वाढ झाली असून, याद्वारे बॅंकेला १००० कोटी मिळाले. गेल्या वर्षी हा आकडा ८८१ कोटी रुपये होता. बॅंकेने या तिमाहीत २,३४,११७ कोटींचा व्यवसाय केला असून, त्यात वाढ झाल्याचे स्पष्ट झाले आहे. बॅंकेने ९४,६४५ कोटींच्या कर्जांचे वितरण केले आहे. बॅंकेकडील ठेवीत वाढ झाली असून, ३१ मार्चअखेर बॅंकेकडे १, ४०,६५० कोटी रुपयांच्या ठेवी आहेत. थकीत कर्जामध्ये ३,१०९ कोटींची घट झाली असून, गेल्या वर्षीच्या तुलनेत (१८,४३३ कोटी) चौथ्या तिमाहीअखेर थकीत कर्जांचे प्रमाण १५,३२४ कोटी आहे.