Coronavirus : सावित्रीबाई फुले पुणे विद्यापीठात 100 जणांची विलगीकरणाची व्यवस्था 

पुणे - सावित्रीबाई फुले पुणे विद्यापीठाच्या 'अ‍ॅकेडमीक गेस्ट हाऊस'मध्ये विलगीकरण कक्ष तयार केला आहे. तेथे 100 खाटांची व्यवस्था केली आहे. हे गेस्ट हाऊस प्रशासनाच्या ताब्यात दिले आहे. मात्र, अद्याप तेथे विलगीकरणासाठी कोणालाही ठेवलेले नाही, असे कुलसचिव डाॅ. प्रफुल्ल पवार यांनी सांगितले. 

- बातम्या ऐकण्यासाठी डाऊनलोड करा ई-सकाळचे ऍप

महाराष्ट्रात 'कोरोना'चे रुग्ण सापडण्यामध्ये मुंबई नंतर पुण्याचा क्रमांक लागत आहे. पुणे शहरातील पाॅजिटीव्ह रुग्णांची संख्या 60 च्या पुढे गेली आहे. तर पाच जणांचा मृत्यू झाला आहे. रुग्णांची संख्या वाढत असल्याने महापालिकेच्या नायडू रुग्णालयाची क्षमता संपत आली आहे. नायडूमध्ये 100 खाटांची क्षमता असून, सध्या तेथे 85 जणांवर उपचार सुरू आहेत. त्यामुळे रुग्णांवर उपचार करण्यासाठी व विलगीकरणासाठी पर्यायी जागांचा शोध सुरू आहे. सरकारने राज्यातील सर्व वसतिगृह बंद करून ते प्रशासनाच्या ताब्यात देण्याचे आदेश दिले होते. त्यात खासगी संस्थांच्या वसतिगृहांसह पुणे विद्यापीठाचाही समावेश होता. पुणे विद्यापीठातील विद्यार्थी व विद्यार्थिनीचे वसतिगृह बंद असले तरी ते ताब्यात दिले नाहीत. 

पुणेकरांनो चिंता करू नका; शहराला पुरेल इतका भाजीपाला उपलब्ध

महापालिकेचे सहायक आरोग्य प्रमुख डाॅ. संजीव वावरे म्हणाले, "सध्या विलगीकरणासाठी लायगुडे रुग्णालय सिंहगड रस्ता, सणस ग्राऊंड, बोपडी, दळवी रुग्णालय आणि खराडी रक्षक नगर येथे सुमारे 450 जणांची व्यवस्था केली आहे. गरज पडल्यास इतर ठिकाणच्या वसतिगृहात विलगीकरणाची व्यवस्था केली जाईल. 

विद्यार्थ्यांचे साहित्य सुरक्षित 
विद्यार्थ्यांना अचानक वसतीगृह रिकामे करावे लागले. त्यामुळे काही पुस्तक, कपडे घेऊन विद्यार्थी गावाकडे गेले आहेत. रूमच्या कुलुपाच्या चाव्या त्यांच्याकडेच आहेत. या ठिकाणी विलगीकरण कक्ष केले जाणार नाहीत, असे पवार यांनी सांगितले.