Coronavirus : मजूर हवालदिल; पैसे संपल्याने उपासमारीची वेळ

पिंपरी - लॉकडाउनमध्ये कष्टकरी महिला जीवनावश्‍यक वस्तूंच्या शोधात फिरत असतात. ज्या ठिकाणी अशा वस्तू मोफत मिळतात तेथे सकाळपासूनच त्या गर्दी करतात.
पिंपरी - लॉकडाउनमध्ये कष्टकरी महिला जीवनावश्‍यक वस्तूंच्या शोधात फिरत असतात. ज्या ठिकाणी अशा वस्तू मोफत मिळतात तेथे सकाळपासूनच त्या गर्दी करतात.

पिंपरी - लॉकडाउनमुळे शहरात हजारो मजूर अडकून पडले आहेत. पोटाची खळगी भरण्यासाठी शेकडो मैलावरून आलेले हे मजूर हवालदिल झाले आहेत. आता कंत्राटदार गायब, हातातील पैसे संपलेले अशा स्थितीत सर्व जण कामाच्या ठिकाणी बसून आहेत. गावाकडे जाता येत नाही आणि पोटातील आग थांबत नाही. असे सगळे बेचैन करणारे चित्र बांधकाम प्रकल्प आणि मोकळ्या जागांवर ठोकलेल्या पालांवर आहे.

कोरोनाच्या आधी विविध बांधकामांच्या प्रकल्पांसह रस्ते दुरुस्ती, छोट्या पुरवठादार कंपन्या याठिकाणी हे मजूर हजारोंच्या संख्येने काम करत होते. हा वर्ग महाराष्ट्राच्या दुष्काळी पट्ट्यासह कर्नाटक, बिहार, उत्तर प्रदेश या राज्यांमधील आहे. यातील अनेकजण कुटुंबासह अनेक महिन्यांपासून येथे काम करतात. गेल्या महिन्यात कोरोनाचा प्रादुर्भाव सुरू झाला. त्यामुळे देशात लॉकडाउन जाहीर झाला. परिणामी अनेकांनी आपापल्या गावाची पायी वाट धरली. 

आता जे येथे राहिलेले आहेत त्यांची संख्या हजारांत आहे. गेल्या आठवड्यापासून त्यांचे हाल सुरू आहेत. मजुरीचे पैसे संपलेले आहेत. शहरामध्ये अनेक स्वयंसेवा संस्था, व्यक्ती अन्नदान, शिधावाटप करत आहेत. मात्र, त्यांच्यापर्यंत कोणी पोचलेले नाही. कारण त्यांना अशा मजुरांच्या वस्त्या माहीत नाहीत. तसेच कोरोनापासून बचाव असाही हेतू यामागे आहे. मजूर तर आपले राहते ठिकाण सोडून बाहेर पडू शकत नाहीत. पोलिस मारतील किंवा चोर म्हणून लोक मारतील अशीही भीती त्यांच्या मनात आहे. 
याबाबत भारतीय कामगार सेना महासंघाचे उपाध्यक्ष इरफान सय्यद म्हणाले, ‘‘जे कामगार साइटवर आहेत, त्यांना सरकारकडून जेवण मिळते. मात्र, अड्ड्यांवर उभे राहून काम मागणाऱ्या कामगारांच्या जेवणाची कोणतीही ठोस उपाय नाहीत. त्यामुळे त्यांचे जास्त हाल होत आहेत. शहरात बांधकामाच्या साइटसह अन्य साइटवर काम करणारे सुमारे ४० ते ५० हजार कामगार आहेत. भोसरी, निगडी, पिंपरी अशा अड्ड्यांवर काम करणाऱ्यांची संख्याही २० हजारांच्या घरात आहे.’’

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com