ABG Shipyard : ईडीकडून महाराष्ट्र, गुजरातमध्ये छापेमारी

नवी दिल्ली : देशातील सर्वात मोठ्या बँकिंग घोटाळ्याप्रकरणी ईडीने (ED मोठी कारवाई केली आहे. ED ने ABG शिपयार्ड बँक फसवणूक प्रकरणात मनी लाँड्रिंगची (Money Laundering) चौकशी सुरू केली असून, ईडीने महाराष्ट्र आणि गुजरातमध्ये एबीजी शिपयार्ड आणि त्याच्या संचालकांच्या परिसरात 26 ठिकाणी छापे टाकले आहे. 22 हजार कोटींहून अधिक किमतीचा हा देशातील सर्वात मोठा बँकिंग घोटाळा (Banking Fraud) असल्याचे मानले जात आहे. कंपनीने 28 बँकांकडून कर्ज घेतले होते. या घोटाळ्याबाबत सीबीआयने गुन्हा दाखल केला होता. (ABG Shipyard Bank Fraud Case)

एबीजी शिपयार्ड आणि त्यांचे संचालक ऋषी अग्रवाल, संथानम मुथुस्वामी आणि अश्विनी अग्रवाल यांनी 22 हजार कोटींहून अधिक रुपयांची बँकांची फसवणूक केल्याचे केंद्रीय अन्वेषण विभागाचे म्हणणे आहे. एबीजी शिपयार्ड आणि तिची प्रमुख कंपनी जहाजं बांधणे आणि दुरुस्त करण्याच्या व्यवसायात गुंतलेली असून, गुजरातमधील दहेज आणि सुरत येथे संबंधित कंपनीचे शिपयार्ड आहेत. एसबीआयच्या तक्रारीनुसार, कंपनीने बँकेकडून 2925 कोटी रुपयांचे कर्ज घेतले होते. ICICI कडून 7089 कोटी रुपये, IDBI कडून 3634 कोटी रुपये, बँक ऑफ बडोदाकडून 1614 कोटी रुपये, PNB कडून 1244 कोटी रुपये आणि IOB बँकेकडून घेतलेल्या 1228 कोटी रुपयांची थकबाकी असल्याचे सांगितले जात आहे.

काय आहे ABG शिपयार्ड आणि कशी झाली फसवणूक

एबीजी शिपयार्ड लिमिटेड ही एबीजी ग्रुपची प्रमुख कंपनी आहे. ही कंपनी गुजरातमधील दहेज आणि सुरत येथे जहाजांची निर्मिती (Ship Manufacturing) आणि दुरुस्तीचे काम करते. ABG शिपयार्ड लिमिटेडची स्थापना 1985 मध्ये करण्यात आली असून, आतापर्यंत या कंपनीने 165 हून अधिक जहाजांची निर्मिती केली आहे. मात्र, एकेकाळची भारतातील सर्वात मोठी खाजगी शिपयार्ड कंपनी आता कर्जबाजारी झाली आहे.

स्टेट बँकेने केलेल्या (SBI) तक्रारीनुसार, कंपनीने बँकेकडून 2,925 कोटी रुपये, आयसीआयसीआय (ICICI) बँकेकडून 7,089 कोटी रुपये, आयडीबीआय बँकेकडून 3,634 कोटी रुपये, बँक ऑफ बडोदाकडून 1,614 कोटी रुपये, पंजाब नॅशनल बँकेकडून 1,244 कोटी रुपये, तर इंडियन ओव्हरसीज बँकेकडून 1,228 कोटी रुपयांचे कर्ज घेतले आहे. मात्र, त्याचा वापर ज्या कारणासाठी दाखविण्यात आला होता तेथे खर्च न करता इतर ठिकाणी करण्यात आल्याचे तक्रारीत नमुद करण्यात आले आहे. या कंपनीला 28 बँका आणि वित्तीय संस्थांकडून क्रेडिट सुविधा मंजूर करण्यात आल्या होत्या, ज्यामध्ये SBI चे एक्सपोजर 2468.51 कोटी इतके होते.

पाच वर्षे सुरू होता फसवणुकीचा खेळ

18 जानेवारी 2019 रोजी अर्नेस्ट अँड यंगने सादर केलेल्या फॉरेन्सिक ऑडिट अहवालातून (एप्रिल 2012 ते जुलै 2017) आरोपींनी एकमेकांशी संगनमत करून बेकायदेशीर प्रकार केल्याचे समोर आले आहे. यामध्ये भांडवल वळवणे, अनियमितता, गुन्हेगारी विश्‍वासाचा भंग आणि बँकांकडून घेतलेले पैसे मुळ कारणासाठी न वापरता इतर कारणांसाठी वापरणे यांचा समावेश आहे. ऑडिटमध्ये हे उघड झाले आहे की, 2012 आणि 2017 दरम्यान आरोपींनी निधीचा गैरवापर आणि अवैध गोष्टी घडवून आणल्याचा आरोप करण्यात आला आहे.