राहुल गांधीनी मांसाहार केला नाही; रेस्टॉरंटचे स्पष्टीकरण

काठमांडू- मानस सरोवर यात्रेला जात असताना काँग्रेसचे अध्यक्ष राहुल गांधी यांनी मासांहार केल्याचे वृत्त नेपाळच्या मिडीयाने दिेले आणि एका नव्या वादाला सुरवात झाली. मात्र, यावर राहुल गांधीनी जेवण केलेल्या रेस्टॉरंटच्या व्यवस्थापनाने स्पष्टीकरण देताना राहुल गांधीनी मांसाहार केला नसल्याचे स्पष्ट केले आहे.

राहूल गांधी 31 ऑगस्ट रोजी काठमांडू येथिल वूटू रेस्टॉरंट येथे जेवणासाठी गेले होते. त्यावेळी राहुल गांधीनी मांसाहारी डिश जेवणासाठी मागवली होती, असे त्या रेस्टॉरंटच्या वेटरने सांगितले आणि त्यानंतर राहुल गांधी वादात सापडले होते. धार्मिक भावना दुखावल्याचा आरोप त्यांच्यावर करण्यात आला होता.

यानंतर, वूटू रेस्टॉरंटने याविषयी स्पष्टीकरण देताना राहुल गांधीनी मांसाहार केल्याचे वृत्त खोटे असल्याचे सांगितले आहे. वूटू रेस्टॉरंटने आपल्या अधिकृत फेसबुक पेजवरुन याचे स्पष्टीकरण दिले आहे. त्यामध्ये त्यांनी म्हटले आहे की, ही बातमी मिडीयानेच पसरवली आहे. राहुल गांधीच्या जेवणासंबधी वूटूच्या कुठल्याही कर्मचाऱ्याने कसलेही वृत्त मिडीयाला दिले नाही. आम्ही स्पष्ट करतो की, राहुल गांधी यांनी मेन्यू कार्ड पाहून शाकाहारी जेवणाचीच ऑर्डर दिली. त्यांनी कुठल्याही प्रकारचा मांसाहार केला नाही. त्यांनी पुर्णपणे शाकाहारी जेवणाचा आस्वाद घेतला होता.