कपिल सिब्बल यांच्यानंतर आता चिदंबरम यांचा काँग्रेसला उपदेशाचा डोस!

Sakal | Wednesday, 18 November 2020

काँग्रेस नेते कपील सिब्बल यांनी उघडपणे पक्षावर केलेल्या टीकेमुळे पक्षांतर्गत गोंधळ समोर येत असताना चिदंबरम यांचं वक्तव्य आलं आहे.

नवी दिल्ली- बिहार विधानसभा निवडणुकीने दाखवून दिलंय की काँग्रेसचा ग्राऊंड लेव्हलला संघटनात्मक प्रभाव नाही किंवा तो खूप कमकूवत झाला आहे, असं वक्तव्य काँग्रेसचे ज्येष्ठ नेते पी. चिदंबरम यांनी केलं आहे. काँग्रेस नेते कपील सिब्बल यांनी उघडपणे पक्षावर केलेल्या टीकेमुळे पक्षांतर्गत गोंधळ समोर येत असताना चिदंबरम यांचं वक्तव्य आलं आहे. काँग्रेसने बिहारमध्ये गरजेपेक्षा अधिक जागा लढवल्या, असंही चिदंबरम यांनी दैनिक भास्करला दिलेल्या मुलाखतीत म्हटलं आहे. 

मी गुजरात, मध्य प्रदेश, उत्तर प्रदेश आणि कर्नाटकमधील निकालावरुन अधिक चिंतीत आहे. या राज्यातील निकालामुळे पक्षाची संघटात्मक उपस्थिती संपली आहे किंवा ती खूपच कमकूवत झाल्याचं स्पष्ट होतं, असं चिदंबरम यांनी म्हटलं आहे. कोरोना महामारीमुळे सरकारविरोधात नाराजी असताना आणि अर्थव्यवस्था घसरत असताना काँग्रेसला याचा फायदा का उठवता आला नाही, असा सवाल त्यांना मुलाखतीमध्ये करण्यात आला होता.  

कर्नाटकच्या मुख्यमंत्र्यांना झोंबले महाराष्ट्राच्या उपमुख्यमंत्र्यांचे वक्तव्य

बिहारमध्ये काँग्रेस आणि आरजेडीला जिंकण्याची संधी होती. आम्ही का हरलो याचं व्यापक पुनरावलोकन आवश्यक आहे. आम्ही राजस्थान, मध्य प्रदेश, छत्तीगड आणि झारखंडमध्ये जिंकलो होतो हे विसरुन चालणार नाही, असंही चिदंबरम म्हणाले.  ते पुढे म्हणाले की, ''बिहार निकालांनी दाखवून दिलंय की स्थानिक पातळीवर संघटना बळकट असेल तर सीपीआय-एमएल CPI-ML आणि एआयएमआयएम AIMIM सारखे छोटे पक्षही चांगली कामगिरी करु शकतात. भाजपविरोधात लढण्यासाठी संघटना तळागाळापर्यंत मजबूत हवी.''

जास्त जागा लढण्याचा काँग्रेसला तोटा झाल्याच्या प्रश्नावर चिदंबरम म्हणाले की, ''काँग्रेसने गरजेपेक्षा अधिक जागा बिहारमध्ये लढल्या. शिवाय 25 अशा जागा होत्या जेथे भाजप गेल्या 20 वर्षांपासून जिंकत आला आहे. त्यामुळे काँग्रेसने 45 जागांवरच निवडणूक लढवायला हवी होती.''

दरम्यान, कपिल सिब्बल यांनी पक्षाला घरचा आहेर दिला होता. काँग्रेसला अडचणीत आणणाऱ्या समस्या आणि त्यांची उत्तरे माहित आहेत, पण काँग्रेसला ती उत्तरे शोधायच्या मार्गात येणाऱ्या अडचणींना ओळखायचेच नाहीये. आमच्यातील काहींनी आमचं म्हणणं ऐकून घेण्याऐवजी आमच्याकडे पाठ फिरवली. आणि आपण सगळे त्याचे परिणाम पाहतोय. फक्त बिहारमधीलच नव्हे तर देशातील लोक जिथे कुठे पोटनिवडणुका होतायत तिथे काँग्रेसला एक चांगला पर्याय म्हणून पाहिलं जात नाही, असं ते म्हणाले होते. 

(edited by- kartik pujari)
 

भाजपमध्ये उमेदवारापेक्षा पक्षालाच अधिक प्राधान्य : शेखर चरेगावकर 
प्रचाराच्या निमित्ताने ते सोलापुरात आले असता त्यांनी पत्रकारांशी संवाद साधला. यावेळी सोलापूर जिल्हा पतसंस्था फेडरेशनचे अध्यक्ष दिलीप पतंगे उपस्थित होते. चरेगावकर म्हणाले, विधान परिषदेच्या पुणे पदवीधर निवडणुकीसाठी भाजपकडून मी देखील ईच्छुक होतो. परंतु मला उमेदवारी मिळाली नाही म्हणून मी नाराज होणाऱ्यां पैकी कार्यकर्ता नाही. भाजपच्या पदवीधर व शिक्षकच्या उमेदवारांच्या प्रचारासाठी मी पाचही जिल्ह्यात फिरत आहे. भाजप हा पार्टी विथ डिफरन्स पक्ष असल्याचे या निवडणुकीतून सर्वांना दिसेल असा विश्वासही त्यांनी यावेळी व्यक्त केला. 
भाजपमध्ये उमेदवारापेक्षा पक्षालाच अधिक प्राधान्य, पुणे पदवीधरमधून पुन्हा भाजपचाच विजय, शेखर चरेगावकर यांचा विश्वास 
सहकाराच्या समस्यांसाठी अभ्यास गट  साखर कारखानदारी, दुग्ध व्यवसाय, सुतगिरणी यासह महाराष्ट्रात असलेल्या विविध सहकारी संस्थांमध्ये काय अडचणी आहेत? त्या अडचणी सोडवण्यासाठी काय उपाय योजना कराव्यात? यासाठी भाजपच्या सहकार आघाडीच्यावतीने सर्वपक्षीय अभ्यासगटाची नियुक्ती केली जाणार आहे. भाजपच्या सहकार आघाडीचे सहसंयोजक पद आपल्याकडे असून सहकार आघाडीच्या माध्यमातून हा अभ्यास गट नियुक्त केला जाणार आहे. त्यानंतर सहकाराला ऊर्जितावस्था आणण्यासाठी ऍक्‍शन प्लॅन तयार केला जाणार असल्याचेही शेखर चरेगावकर यांनी सांगितले.