Drugs Case : अकाली दलाच्या नेत्याचं कोर्टात आत्मसमर्पण

ड्रग्जप्रकरणी (Drugs Case) अकाली दलाचे नेते बिक्रम सिंह मजिठिया (Bikram Singh Majithia) यांनी आत्मसमर्पण केलंय. बिक्रम सिंह यांना सर्वोच्च न्यायालयाकडून 23 फेब्रुवारीपर्यंत दिलासा मिळाला होता. त्यानंतर त्यांनी आज मोहाली सत्र न्यायालयात (Mohali Sessions Court) आत्मसमर्पण केलं. दरम्यान, न्यायालयानं बिक्रम सिंह यांना 8 मार्चपर्यंत न्यायालयीन कोठडी सुनावलीय. सर्वोच्च न्यायालयानं मजिठिया यांना 20 फेब्रुवारी रोजी पंजाब विधानसभेच्या निवडणुका (Punjab Assembly Election) झाल्यानंतर, ट्रायल कोर्टासमोर आत्मसमर्पण करण्याचे निर्देश दिले होते.

सर्वोच्च न्यायालयानं 31 जानेवारी रोजी शिरोमणी अकाली दलाचे नेते बिक्रम सिंह यांना ड्रग्जप्रकरणी दिलासा देत पंजाब पोलिसांना 23 फेब्रुवारीपर्यंत अटक न करण्याचे निर्देश दिले होते, जेणेकरून ते राज्यातील निवडणूक प्रक्रियेत सहभागी होऊ शकतील, असं नमूद केलं होतं. मुख्य न्यायमूर्ती एन. व्ही. रमण, न्यायमूर्ती ए. एस. बोपण्णा आणि न्यायमूर्ती हिमा कोहली यांच्या खंडपीठानं हा निर्णय घेतलाय.

मजिठिया यांच्यावर गेल्या वर्षी 20 डिसेंबर रोजी ड्रग्सप्रकरणी (एनडीपीएस) कायद्यांतर्गत गुन्हा दाखल करण्यात आला होता. पंजाब आणि हरियाणा उच्च न्यायालयानं (Haryana High Court) 24 जानेवारी रोजी मजिठिया यांचा अटकपूर्व जामीन अर्ज फेटाळला होता. त्यानंतर सर्वोच्च न्यायालयात (Supreme Court) अपील दाखल करण्यात आलं. सर्वोच्च न्यायालयानं 27 जानेवारी रोजी पंजाब सरकारला 31 जानेवारीपर्यंत मजिठिया यांच्यावर कोणतीही जबरदस्ती कारवाई करू नये, असं सांगितलं होतं.