सत्ताधारी भाजपची वेबसाईट 14 दिवसांनंतरही बंदच!

नवी दिल्ली : भारतीय जनता पक्षाची वेबसाईट 5 मार्चला अज्ञात हॅकर्सकडून हॅक करण्यात आली होती. आज (ता. 18) चौदा दिवस होऊन गेले, तरीही अजून त्यांच्या साईटची स्थिती ही 'जैसे थे'च आहे.

वेबसाईट हॅक करून हॅकर्सकडून या वेबसाईटवर अश्लील छायाचित्रेही अपलोड करण्यात आली होती. तसेच वेबसाईटच्या होमपेजवर मोदी व जर्मनीचे चान्सलर अँजेला मार्केल यांच्यावरील मीम दिसत होते. छत्तीसगडमधील भाजप कार्यकर्त्यांनी याबाबत पोलिसांमध्ये तक्रारही नोंदवली आहे. 

माहिती प्रसारणमंत्री रवीशंकर प्रसाद यांनी सांगितले की, आमची वेबसाईट काही मिनिटांसाठी हॅक झाली होती. त्यावर सध्या काम सुरू असून, ती लवकरच पूर्ववत होईल. मोठ्या प्रमाणात अॅक्टीव्ह असलेल्या भाजपच्या आयटी सेलला त्यांची वेबसाईट हॅक केल्यामुळे ट्रोल केले जात आहे.

भाजपची वेबसाईट हॅक झाल्यानंतर काँग्रेसच्या सोशल मिडिया प्रभारी दिव्या स्पंदना यांनी नेटीझन्सना ट्विट करून भाजपची वेबसाईट बघण्याचे आवाहन केले. भाजपची http://www.bjp.org/ ही अधिकृत वेबसाईट आहे.