मांडवातली लाईट गेली आणि भर लग्नात नवरा-नवरीच बदलले!

मध्य प्रदेशातल्या उज्जैनमध्ये दोन बहिणींचं लग्न सुरू होतं. या लग्नातच लाईट गेली आणि जे काही घडलं ते अगदी एखाद्या मालिकेच्या कथानकाला शोभेल असंच होतं. लाईट गेल्यामुळे भर मांडवात नवरा-नवरींचीच अदलाबदल झाली. दोन्ही बहिणींनी वेगळ्याच नवरदेवांसोबत लग्नगाठ बांधली.

रविवारी रमेशलाल यांच्या दोन मुली, निकिता आणि करिश्मा यांचं भोला आणि गणेश या दोन तरुणांशी लग्न होत होतं. दोघींनीही एकसारखे कपडे घातले होते आणि डोक्यावर पदरही घेतला होता. त्यामुळे लग्नाच्या वेळी झालेल्या या अदलाबदलीबद्दल कोणाला कळलंही नाही.

पंडितांनीही दोन्ही नवरदेवांना या बदललेल्या वधूंसोबत सप्तपदी घेण्यास सांगितलं. जेव्हा हे दोन्ही नवरदेव आपापल्या वधूंना घेऊन घरी परतले, त्यावेळी हा सगळा प्रकार उघडकीस आला. दीर्घकाळ वादविवाद झाल्यानंतर दोन्ही कुटुंबांनी मध्यम मार्ग काढला. दुसऱ्या दिवशी पुन्हा एकदा या वधूवरांना सगळे विधी करावे लागले.