स्वयंपाकाचा गॅस आता महागला 

नवी दिल्ली (पीटीआय) : स्वयंपाकाच्या गॅस सिलिंडरच्या दरात सोमवारपासून वाढ झाली आहे. स्वयंपाकाची अंशदानित गॅस सिलिंडरच्या दरात 2.89 रुपये वाढ करण्यात आली असून, तो आता 502.4 रुपयांवर गेला आहे. दिल्लीत विनाअंशदानित गॅस सिलिंडरचा दर 59 रुपयांनी वाढला आहे. 

आंतरराष्ट्रीय पातळीवर वाढलेले भाव आणि परकी चलन विनिमय दरातील चढउतार यामुळे गॅस सिलिंडरच्या दरात वाढ करण्यात आली आहे, अशी माहिती इंडियन ऑईल कॉर्पोरेशनने दिली. अंशदानित गॅस सिलिंडरची दरवाढ प्रामुख्याने वस्तू व सेवा करामुळे (जीएसटी) झालेली असल्याचे कंपनीने म्हटले आहे. विनाअंशदानित गॅस सिलिंडरसाठी ग्राहकांना मिळणारे अंशदान सप्टेंबरमध्ये प्रतिसिलिंडर 320.49 रुपये होते. ते ऑक्‍टोबरमध्ये 376.60 रुपये झाले. एलपीजी दरवाढ करताना ग्राहकांवर त्याचा फारसा बोजा पडू नये, याची काळजी घेण्यात आल्याचे कंपनीने नमूद केले आहे.