दिल्लीत प्रदूषणाची तीव्रता कायम

नवी दिल्ली - दिल्लीतील प्रदूषणाची तीव्रता आजदेखील कायम राहिल्याने पुन्हा एकदा राजधानीचा श्‍वास गुदमरला. दिल्लीतील अनेक ठिकाणांवर आज हवेच्या गुणवत्तेचा निर्देशांक हा धोक्‍याच्या पातळीवर पोचलेला होता. याचा मोठा फटका सार्वजनिक दळणवळणालाही बसला. तत्पूर्वी, शनिवारी वेगाने वाहणारे वारे आणि पावसामुळे प्रदूषणामध्ये थोडी घट झाली होती. दिल्लीमध्ये नव्याने येणाऱ्या वाऱ्यामुळे प्रदूषणकारी घटक येथे दाखल होत असल्याचे तज्ज्ञांनी म्हटले आहे.

दिल्लीतील पुसा, बवाना, आनंदविहार, अशोकविहार, मुंडका आणि पंजाबीबाग या भागांतील हवेत मोठ्या प्रमाणावर विषारी घटक आढळून आले.

राजधानीलगतचा परिसर असणाऱ्या एनसीआर, नोएडा, गाझियाबाद आणि ग्रेटर नोएडामध्ये हवेच्या प्रदूषणाची स्थिती अधिक गंभीर झाली होती. ‘नासा’ने आज टिपलेल्या छायाचित्रात पंजाब, हरियाना, दिल्ली, उत्तर प्रदेश, बिहार, झारखंड आणि पश्‍चिम बंगालवर धुराचे गडद आच्छादन दिसून आले.