डोवाल पुन्हा राष्ट्रीय सुरक्षा सल्लागारपदी; मिळणार कॅबिनेट मंत्रीपदाचा दर्जा

नवी दिल्ली : अजित डोवाल यांची पुन्हा एकदा राष्ट्रीय सुरक्षा सल्लागारपदी (एएनआय) नियुक्ती करण्यात आली आहे. तसेच त्यांना कॅबिनेट मंत्रिपदाचा दर्जा देखील बहाल करण्यात आला आहे.

ही नियुक्ती पुढील पाच वर्षांसाठी असणार आहे. 2014 साली त्यांची राष्ट्रीय सुरक्षा सल्लागार म्हणून नियुक्ती करण्यात आली होती. त्यानंतर सलग दुसऱ्यांदा डोवाल यांची सल्लागारपदी पुन्हा एकदा नियुक्ती करण्यात आली आहे.
 
डोवाल यांच्या मार्गदर्शनाखाली 2016 मध्ये उरी येथे आणि 2019 मध्ये बालाकोट येथे सर्जिकल स्ट्राईक करण्यात आला होता. डोवाल हे 1968 च्या बॅचचे आयपीएस अधिकारी आहेत. तसेच त्यांनी इंटेलिजन्स ब्युरो (आयबी) चे प्रमुखपद भूषविले आहे. डोवाल हे कीर्ती चक्र मिळविणारे पहिले पोलिस अधिकारी आहेत.