चार दिवस झाले; भाजपची वेबसाईट अद्यापही बंदच; डेटाबेस हॅक? 

नवी दिल्ली : जगातील सर्वांत मोठा राजकीय पक्ष असल्याचा दावा करणाऱ्या भारतीय जनता पक्षाची (भाजप) अधिकृत वेबसाईट हॅक होऊन चार दिवस झाले, तरीही अद्याप त्यावर तोडगा निघू शकलेला नाही. अजूनही ही वेबसाईट 'अंडर मेंटेनन्स' दिसत आहे. अद्याप भाजपने या प्रकरणावर कोणतीही अधिकृत प्रतिक्रिया दिलेली नाही.

भाजपची ही वेबसाईट 5 मार्च रोजी सकाळी हॅक झाली होती. त्यानंतर 'काम चालू आहे; थोड्याच वेळात पुन्हा ऑनलाईन येऊ' असा संदेश साईटवर झळकत होता. भाजपच्या कार्यकर्त्यांची माहिती असलेला 'डेटाबेस' आणि पक्षाच्या देणगीदारांचे तपशीलही हॅकर्सने ताब्यात घेतले असल्याची चर्चा आहे. त्यामुळेच ही वेबसाईट अद्याप पूर्ववत होऊ शकलेली नाही, असाही अंदाज वर्तविला जात आहे.

याआधी दोन आठवड्यांपूर्वी गुजरात भाजपचे उपाध्यक्ष आय. के. जडेजा यांची वेबसाईटही हॅक करण्यात आली होती. हॅक करून त्या वेबसाईटवर 'पाकिस्तान झिंदाबाद'चे संदेश प्रसिद्ध करण्यात आले होते. गेल्या वर्षी एप्रिलमध्ये संरक्षण मंत्रालयासह इतरही काही विभागांची वेबसाईट हॅक करण्यात आली होती.