काश्मीरमध्ये चकमकीत चार दहशतवाद्यांना कंठस्नान

श्रीनगर: जम्मू-काश्मीरमधील पुलवामा येथे चार दहशतवाद्यांना कंठस्नान घालण्यात सुरक्षा दलाच्या जवानांना यश आले आहे. दहशतवाद्यांकडून शस्त्रसाठाही जप्त करण्यात आला आहे.

पुलवामामधील लस्सीपोरा परिसरात दहशतवादी लपल्याची माहिती सुरक्षा दलाला मिळाली होती. सुरक्षा दलातर्फे पुलवामा येथील लस्सीपोरा भागात गुरुवारी संध्याकाळी शोधमोहीम राबवली जात असताना सुरक्षा दलाचे जवान आणि दहशतवाद्यांमध्ये चकमक झाली होती. शुक्रवारी पहाटेपर्यंत ही चकमक सुरु होती. या चकमकीत सुरक्षा दलांनी चार दहशतवाद्यांचा खात्मा केला आहे. दहशतवाद्यांची ओळख पटवण्याचे काम सुरु आहे.

दरम्यान, शोपियाँ जिल्ह्यातील मोलू-चित्रगाम भागात 3 जून रोजी झालेल्या चकमकीत एका दहशतवाद्याला कंठस्नान घालण्यात आले होते. तर 31 मे रोजी झालेल्या चकमकी दोन दहशतवादी ठार झाले होते तर एक जवान जखमी झाला होता.