पेट्रोल-डिझेलच्या किंमतीत सर्वाधिक वाढ

नवी दिल्ली : मागील चार महिन्यात पेट्रोल व डिझेलच्या किंमतींनी सर्वोच्च आकडा गाठला आहे. मुंबईत पेट्रोलची किंमत सर्वाधिक म्हणजेच 86.56 प्रति/ली. रूपयांवर पोहोचली आहे, तर डिझेलची किंमत 75.54 प्रति/ली. रूपयांवर पोहोचली आहे. तर राजधानी दिल्लीत पेट्रोलची किंमत 79.15 रूपये प्रति/ली. इतकी आहे, तर डिझेलची किंमत 71.15 रूपये प्रति/लीटर इतकी आहे. 

आंतरराष्ट्रीय पातळीवरील कच्चा तेलाच्या वाढत्या किंमतीमुळे देशातील पेट्रोल-डिझेलच्या किंमतीत वाढ झाली आहे. तसेच डॉलरच्या तुलनेत रूपयाच्या घसरणीचाही परिणाम पेट्रोल-डिझेलच्या वाढत्या किंमतीवर झाला आहे, अशी माहिती पेट्रोलियम मंत्री धर्मेंद्र प्रधान यांनी दिली.  

कोलकात्यात पेट्रोलची किंमत 82.06 प्रति/लीटरवर पोहोचली आहे, तर चेन्नईत 82.24 प्रति/लीटरवर पोहोचली आहे. यापूर्वी मुंबईमध्ये मे महिन्यात पेट्रोलची किंमत 78.43 प्रति/ली होती, तर आज पेट्रोलची किंमत मुंबईत 86.24 प्रति/लीटरवर पोहोचली आहे. कच्चा तेलाच्या बॅरलच्या किंमतीत 7 डॉलर्सने वाढ झाली आहे. तसेच अमेरिकेने इराणवर लावलेल्या प्रतिबंधामुळे आता हा पुरवठा कमी होईल.

सीएनजी (कॉम्प्रेस्ड नॅचरल गॅस) व पीएनजीच्या (पाईप नॅचरल गॅस) किंमती या रूपयाच्या घसरणीमुळे मोठ्या प्रमाणात वाढल्या आहेत. 16 ऑगस्टनंतर पेट्रोलच्या किंमतीत 2 रूपयांनी वाढ झाली तर, डिझेलच्या किंमतीत 2.42 रूपयांनी वाढ झाली आहे. 

ऑगस्टमध्ये विरोधी पक्षांनी व अनेक औद्योगिक संघटनांनी इंधनावरील उत्पादन शुल्क कमी करण्याबाबक सरकारकडे मागणी केली होती.